Dili, 16 Septembru 2025 (Média Democracia) – Sekretáriu Estadu Kooperativa (SEKoop) kapasita formasaun bazika durante loron lima ba membru Kooperativa Fámilia Kiik (KFK) no Kooperativa Tane Kbi’it no Haburas Ekonomia Fámilia-STA husi RAEOA hodi iha Koñesimentu ho kle’an ba dirijente atu dezenvolve Kooperativa iha futuru. Formasaun ne’e hala’o iha salaun esperansa Dili.
Iha entrevista ho Sekretariu Estadu Kooperativa SEKoop Arsénio Pereira da Silva hateten, nu’udar membru Governu liuhusi Sekretariu Estadu Kooperativa (SEKoop) hodi atende ba grupu Kooperativa sira ne’ebé iha no Kooperativa Primaria no Sekundaria.
SEKoop nia programa oinsá atu eleva koñesimentu ba Kooperativa Primaria sira, liu-liu sira ne’ebé presiza atu hetan tan koñesimentu hodi dezenvolve Kooperativa. Ho ida ne’e sai hanesan atividade rutina SEKoop nia ne’ebé serbisu hamutuk ho movimentu Kooperativa sira.
Nia informa kona-ba formasaun bazika oinsá membru kooperativa sira atu komprende didi’ak sira nia servisu no hasae mós sira nia koñesimentu atu halo saida.
“Formador sira atu fó formasaun espesialidade kontabilidade ba Kooperativa Fámilia Kiik (KFK), atu hanorin sira kona-ba formasaun bazika nia no sira hatene oinsá estrutura sira atu haree kona-ba relatoriu sira. Hodi kanaliza iha ne’ebé de’it, ida ne’e sai hanesan basiku ida ba membru Kooperativa Fámilia Kiik (KFK) hodi halo sira atividade kona-ba setor Kooperativa ne’e rasik.” Dehan Sekretariu Estadu Kooperativa SEKoop Arsénio Pereira da Silva
Iha fatin hanesan, Prezidente KFK Lorensu Kefi hateten, ohin Sekoop mai abertura ba formasaun ida ne’e atu bele kapasita kooperativa bazika, haree ba formador sira husi Sekoop nia kooperativa no formasaun ne’e laos foin hahu maibé hahu tinan 3 to’o tinan 4 ona no ohin kontinua nafatin ba iha kooperativa primariu rua ne’ebe foun.
“Iha kooperativa rua ne’e lao ho fundador sira kuaze husi Rejiaun Administrativu Espesial Oecusse Ambenu (RAEOA) hotu, tanba ami dook husi knua iha ne’e halibur ema sira ne’ebé fa’an pentolan no balun la eskola atu nune’e ami bele ajuda malu kria ami nia kooperativa primariu rua ne’ebé atu bele fasilita malu iha atividade sira kona-ba buka moris nian, tanba ne’e ohin ami husu Sekoop atu haruka formador sira hodi fasilita ami nia kooperativa rua ho materia bazika nian.” Dehan Prezidente KFK Lorensu Kefi
Nia reafirma, formasaun ohin ne’e membru ne’ebé partisipa hamutuk ema na’in 60 tanba kooperativa ne’e foin harii, no membru sira ne’e maioria husi RAEOA, espera ba oin membru bele aumenta tan no susesu nafatin future.
Reportajen : Domingas
Foto : Media Officer Sekoop