Dili, 30 Outobru 2024 (Média Democracia) – Marina da Costa husi munisipiu Viqueque Postu-Administrativu Uatu-lari Suco Uaitame idade 47, Agora daudaun hela iha Tasi-Tolu Postu-Administrativu Dom-Aleixo Suco Comoro, Munisipiu Dili.
Iha entrevista ho vendadora fa’an batar-da’an Marina da costa hateten, batar ne’ebé fa’an ne’e hahu deste tinan kotuk kedas agora tinan rua ona, durante fa’an batar folin baratu los fuan 7 dolar $1, tanba batar uluk ne’e barak los, maibé agora ne’e batar menus entaun batar folin sa’e no karun.
“Hau fa’an batar ne’e deste uluk kedas agora tinan rua ona, durante ha’u fa’an batar ne’e uluk ema sosa barak tanba fuan 7 dolar $1 entaun bele hetan osan $10 ba to’o $15 maibé agora ne’e batar la iha nune’e nia folin batar mós karun, entaun dalaruma ema la sosa.” Lia hirak ne’e hato’o husi vendadora fa’an batar-da’an Marina da costa
Nia hatutan durante tinan rua fa’an batar-da’an ne’e problema ne’ebé nia hasoru lorloron mak hanesan fatin atu fa’an la iha, entaun ba fa’an iha estrada ninin, dalaruma ema la sosa batar no dalaruma saneamentu sira duni atu labele fa’an iha dalan ninin maibé tanba deit oan sira-nia eskola entaun nia nafatin fa’an batar-da’an, maske saneamentu duni hela de’it.
“Ha’u ho kaben kous oan nain 7 mane nain tolu no feto nain haat, entaun ida kiik ne’e mak la eskola maibe seluk ne’e eskola tanba liuhusi batar ne’ebe fa’an ne’e bele suporta netik oan sira–nia eskola nomos nesesidade familia lorloron nian, tanba ita hela iha Dili ne’e hetan osan mos susar los.” Tenik vendadora fa’an batar-da’an Marina da costa
Nia salienta antes fa’an batar ne’e uluk fa’an sasan iha karosa laran tanba saneamentu sira mai duni hela de’it no sasan mós ema la sosa, nune’e nia desidi fali fa’an batar-da’an. Primeiru nia atu fa’an batar-da’an ne’e uza osan $50.
Reportajen : Domingas
Foto : Domingas