Dili, 09 Outubru 2025 (Média Democracia) – Sekretáriu Estadu Kooperativa (SeKoop) asina akordu servisu hamutuk ho Camara Comercio industria Timor-Leste CCI-TL atu estabelese mekanismu kooperativa no hametin setor kooperativa iha TL.
Sekretáriu Estadu Kooperativa Arsénio Pereira da Silva hateten, objetivu jerál husi asina nota entendimentu ida ne’e atu estabelese mekanizmu kooperasaun institusionál hodi promove no hametin setór kooperativa atu nune’e hadi’a kreximentu ekonómiku, no kria ambiente negósiu ne’ebé favoravel ba kooperativa sira iha Timor-Leste.
“Ha’u sente onradu tebes hodi bele realiza akordu ida ne’e, tanba dala barak ko’alia formal de’it, maibé ohin ita realiza akordu ona ida-ne’e oinsá guia ita atu serbisu hamutuk, tuir ita-nia lema hateten hamutuk halo mudansa liuhusi dalan kooperativa.” Dehan Sekretariu Estadu Kooperativa Arsénio Pereira da Silva (07/10/2025)
Sekretariu hatutan, area kolaborasaun sira husi parte rua sei halo mak promove polítika no regulamentu sira ne’ebé fó apoiu ba kooperativa sira. Nune’e mós fasilita formasaun no kapasitasaun ba empreza kooperativa sira, hadi’a asesu ba rekursu finanseiru no oportunidade ba merkadu, enkoraja parseria públiku-privadu no hametin advokasia no polítika públika ba setór kooperativa.
“Kooperasaun ne’e sei fahe informasaun no esperiénsia sira, organizasaun konjunta ba seminariu, workshop, no programa formasaun, dezenvolvimentu polítika no projetu konjuntu sira, kriasaun rede no ligasaun sira entre kooperativa sira no setór emprezariál no kriasaun grupu servisu hamutuk (50-50%) entre SeKoop ho CCI-TL.” Hatutan Sekretáriu Estadu Kooperativa
Nia informa SeKoop nian dezenvolve no implementa polítika sira hodi fó apoiu ba kooperativa sira, asegura fiskalizasaun no governasaun di’ak ba setór sira ne’ebé iha. Atu nune’e fasilita asesu ba finansiamentu (Banku Dezenvolvimentu Nasional, mikrokreditu, nsst), apoia asesu ba merkadu lokál no internasionál, promove formasaun téknika no jestaun kooperativa no estimula inovasaun, dijitalizasaun, no sertifikasaun ba produtu kooperativa sira.
“Ita servisu hamutuk oinsá halo mudansa ba ita-nia kooperativa, tanba atu halo mudansa SeKoop labele hamriik mesak.” Informa Sekretáriu Estadu Kooperativa Arsénio Pereira da Silva
Iha fatin hanesan, Prezidente CCI-TL, Jorge Serrano hateten, hanesan mahon ba setór privadu previzlejiu boot ohin bele selebra akordu ho SeKoop.
“Ida-ne’e, momentu importante tanba CCI-TL nu’udar parseiru estratéjiku Governu nian serbisu hamutuk hodi bele atua setór privadu produtivu sira haree ba dezenvolvimentu ita-nia rai, no integra mós planu estratéjiku Governu nian liuliu Ministériu sira ne’ebé hala’o atividade ekonómiku.” Dehan Prezidente CCI-TL, Jorge Serrano
Tuir CCI-TL SeKoop iha nia papél importante atu serbisu hamutuk hodi dezenvolve nasaun ne’e. Ita Timor-oan presiza fó liman ba malu, serbisu hamutuk tanba agora ita tama ba ASEAN no Organizasaun Munidiál Komérsiu (OMK), nune’e tenke preparadu hakat ba oin.
Husi akordu ne’e CCI-TL nia kompromisu mak fornese apoiu tékniku no konsultoria espesializada, kria rede no parseria estratéjiku nasionál no internasionál.
“Ho organiza formasaun negósiu no jestaun nian, promove ambiente negósiu ne’ebé favoravel no partisipasaun iha feira komersiál no eventu ekonómiku sira, estimula integrasaun kooperativa sira iha kadeia valór no komérsiu internasionál.” Hatutan Prezidente CCI-TL, Jorge Serrano
Aleinde ne’e, suporta inovasaun, marketing, no dijitalizasaun, partisipa iha grupu traballu no mobiliza rekursu ho parseiru internasionál sira tanba akordu ne’e ho prazu tinan tolu.
Kompromisu mútua SEKoop no CCI-TL nian mak atu halibur forsa hodi hametin movimentu kooperativa no setór privadu nasionál, hodi promove dezenvolvimentu inkluzivu no sustentável iha Timor-Leste.
Reportajen : Domingas
Foto : Media SeKoop