Dili, 17 Outubru 2025 (Média Democracia) – Sekretária Estadu ba Igualdade-SEI liuhusi Diretora DNDIJ-SEI ho Reprezentante Prezidente Autoridade Munisípiu (PAM) Dili, Sekertaria Asuntu Sosiais nomos Prezidente Asosiasaun Feto Munisípiu Dili (AFEMDIL), hala’o abertura ba iha Serimonia Formasaun no Kapasitasaun kona-ba Hakbi’it Feto iha Vida Ekonómia Família. Atividade ne’e organiza husi Asosiasaun Feto Munisípiu Dili (AFEMDIL), formasaun ne’e Media Democracia asesu husi pajina SEI Sexta Semana ne’e.
Diretora DNDIJ-SEI Olga da Costa Monteiro, iha nia intervensaun hateten, Sekretaria Estadu ba Igualdade, hato’o parabens ba Asosiasaun Feto Munisípiu Dili (AFEMDIL) tanba iha inisiativa di’ak no relevante ida ne’e, atu fó formasaun no Kapasita feto sira iha área Hakbi’it Ekonómia.
“Objetivu husi Formasaun refere, mak atu fó formasaun no kapasitasaun ba Feto Potensial no Grupu Feto sira iha Munisípiu Dili, nune’e liuhusi formasaun refere bele aumenta sira-nia kapasidade hodi bele halo jestaun di’ak liután ba iha sira-nia grupu rasik ne’ebé hetan ona Fundus husi S.E.I.” Dehan Diretora DNDIJ-SEI Olga da Costa Monteiro
Diretora DNDIJ-SEI afirma, atividade hanesan mak prova konkretu katak feto sira iha Munisípiu Dili no iha Timor-Leste kompletu la’o ba Frente ho laran forte ho motivasaun atu parte ativa iha dezenvolvimentu iha sosiu-ekonómiku nasaun, Feto sira labele de’it hetan apoiu moral, maibé presiza asesu ba kapasidade informasaun no mekanismu atu sustenta sira-nia família, apoiu iha grupu laran no komunidade.
“Formasaun iha área ekonómiku mak instrumentu ne’ebé feto bele uza atu sai independente, aumenta sira-nia konfiansa no bele fó desizaun ba sira-nia lian no atividade hanesan ne’e bele ajuda feto sira hahu sira-nia negósiu rasik, dezenvolve produtu lokál aumenta rendimentu família no fó esperansa ba labarik sira atu hetan futuru di’ak liu.” Afirma Diretora DNDIJ-SEI
Nia informa, formasaun refere iha area ekonomia nian sai hanesan instrumentu ida ba feto sira bele utiliza nune’e hodi aumenta sira-nia konfiansa hodi foti desizaun ruma halo atividade negósiu hodi fasilita oan sira ba nivel edukasaun.
Esplika liután Seremónia Formasaun no Kapasitasaun refere, hala’o durante loron rua no hetan fasilita husi Ekipa IADE ne’ebé sei fahe matéria kona-ba akuntabilidade no formasaun refere partisipa husi reprezentante husi Administradór Postu Nain Lima (5), Membru Asosiasaun Feto Munisípiu Dili husi Postu lima (5) no Grupu Feto Potensiál husi Munisípiu Dili.
Reportajen : Nelfiano
Foto : Media S.E.I