Dili, 17 Outubru 2025 (Média Democracia) – Organizasaun Naun Governamental MARYMACKILLOP realiza atividade konsultasariu partisipatoriu ba parte interesada sira ne’ebé sai hanesan parseriu servisu hamutuk ba implementasaun programa kona-ba MaryMackillop Edukasaun no Subsistensia. Atividade ne’e hala’o iha kinta-feira semana ne’e iha maubara room plaza Dili.
Iha entrevista ho Diretor MaryMackillop Today MMT Alipio Baltazad hateten, Atividade ohin bolu dehan konsultasariu partisipatoriu ba iha parte interesada sira ne’ebé sai hanesan parseriu servisu hamutuk ho ninian objetivu maka hakarak konvida parseriu sira atu bele mai halo diskusaun hamutuk no haree ba servisu ne’ebé durante ne’e lao ona iha Munisipiu, kona-ba impelementasaun servisu konstrusaun ba eskola.
“Iha diskusaun ida ne’e ami mós sei fó oportunidade ba parseriu sira atu halo identifikasaun ba ami nia susesu servisu no dezafiu sira ne’ebé ami implementa ona iha programa rua iha baze durante tinan tolu ba kotuk, hahu husi 2022 to’o mai 2025 ne’ebé ami implementa ona, iha pontu segundu nian maka, ita mós hakarak atu identifika oportunidade saida maka ita hetan durante implementasaun servisu sira ne’e oinsa, ita atu mellora servisu sira ne’e di’ak liután husi parseriu sira nia kontribuisaun, ideia ba loron ohin nian bele dezenu fali ami nia planu multianual ba tinan tuir mai hahu 2025 to’o 2030.” Dehan Diretor MaryMackillop Today MMT Alipio Baltazad
Diretor hatutan, dezafiu ne’ebé hasoru iha implementasaun programa maka, iha terenu no dalaruma iha komunikasaun ne’ebé la di’ak husi liña koordenasaun Autoridade Lokal nomos nasional, Dalaruma mós iha komprendesaun ne’ebé la hanesan husi parte servisu hamutuk nian.
“Husi dezafiu hirak ne’ebé iha maka ohin ami konvoka reuniaun ida ne’e atu ami bele rona ideia husi sira kona-ba frakeza ka susesu ne’ebé ami hetan, nune’e ba oin ita bele halo di’ak liután iha futuru.” Hatutan Diretor MaryMackillop Today MMT Alipio Baltazad
Diretor MaryMackillop informa, programa implementasaun ne’e ba deit eskola sira hanesan iha munisipiu Dili, Ermera, Liquisa, Manatutu no servisu iha ne’ebá balun remata ona no balun seidauk remata. Politika Marry bainhira implementa servisu iha Munisipiu ida entaun tenke uza politika kobertura komprensivu, signifika katak bainhira implementa servisu iha eskola tenke kobre hotu eskola sira iha Munisipiu no Postu to’o hotu maka foin remata servisu, ida ne’e maka politika komprensivu.
“Tanba ne’e bainhira ita implementa servisu ita tenke kobre servisu eskola ne’e to’o Postu nomos suku sira, nune’e ami foti uluk Munisipiu tolu ka haat, depois servsiu hotu maka ami foin planu fali ba servisu seluk. Planu ba tinan 2025 nian sei hahu husi RAEOA depois tuir mai maka sei tama ba Munisipiu Lautem.” Informa Diretor MaryMackillop Today MMT Alipio Baltazad
Esplika kle’an liután kona-ba atividade konsultasariu partisipatoriu ba parte interesada sira ne’ebé sai hanesan parseriu servisu hamutuk ba implementasaun programa kona-ba MaryMackillop Edukasaun no Subsistensia ne’e, partisipante masimu husi Diretor MaryMackillop ho ninian membru sira, partisipante mós husi NGO nasional nomos internasional sira, Diretor eskola Munisipiu sira, partisipante husi parseriu servisu hanesan SECOOP, Edukasaun, Saude, no IADE.
Reportajen : Domingas
Foto ; Domingas