Dili 24 Outobru 2025 (Média Democracia) – Konsellu Imprensa liuhusi komunikadu ne’ebé hato’o ba jornalista sira iha edifisiu konsellu imprensa kinta feria semana ne’e deklara konsellu imprensa preokupa no lamenta tebes ba aktu ka hahalok ne’ebé pratika husi estudante UNDIL ka insidente relasiona ho ofensa intergirdade fizika hasoru Jornalsita iha Kampus UNDIL
Preszidente Konselhu Imprensa Timor Leste, Cesar Antonio Mali, hatete Konsellu Imprensa espresa ninia preokupasaun no lamentasaun profunda ba insidente ne’ebé akontese iha resintu Universidade Dili UNDIL hasoru jornalista ne’ebé hala’o knaar atu halo kobertura ba konferensia imprensa relasiona ho asuntu sensitivu balu ne’ebé alegadamente envolve pesoal dosente ida iha Universidade Dili.
“Hakarak hato’o ba publiku katak midia nu’udar pilar dahaat ne’ebé kontribui ba haburas demokrasia hodi promove transparensia, defende lia-loos, justisa no sai lian ba ema lian laek sira. Nune’e husu ba publiku atu respeita knaar media no jornalista nian hodi kria ambiente ne’ebé livre no seguru atu media bele hala’o sira nia funsan ho di’ak hodi bele servi publiku ho informasaun ne’ebé loos no kredivel.” Dehan Preszidente Konselhu Imprensa Timor Leste, Cesar Antonio Mali
Preszidente Konselhu Imprensa hatutan hahalok impede knaar jornalista nian la’os de’it viola Liberdade Imprensa no Liberdade Espresaun maibé viola mós publiku nia direitu atu hetan informasaun. direitu ne’ebé konsagra iha konstituisaun RDTL. Relasiona ho akontesimentu refere mak Konselhu Imprensa espresa lamentasaun ne’ebé kle’an ba aktu ofensa intergirdade fizika simples hodi impede ona jornalista sira ezerse sira-nia funsaun iha espasu publiku ho pozisaun sira tuirmai ne’e.
“Apela ba Instituisaun Ensinu Superiór no Institusaun hotu-hotu atu garante espasu ne’ebé seguru no livre ba jornalista sira bele ezerse sira-nia funsaun ho livre. Enkoraja jornalista no média sira hotu atu kontinua hala’o knaar ho profisionál, nakonu ho responsabilidade tuir Kódigu Étika Jornalista nian. Apela ba Orgaun Komunikasaun Sosial sira bainhira emprega pesoal ruma sai jornalista iha ita-boot sira-nia media minimu tenke iha kartaun estajiariu atu asegura jornalista sira-nia direitu bainhira ezerse funsaun jornalistika nian iha terreinu.” Dehan Preszidente Konselhu Imprensa Timor-Leste
Preszidente Konselhu Imprensa afirma kompromisu Konselhu Imprensa nian atu kontinua defende Liberdade Imprensa, Liberdade Espresaun hodi garante publiku asesu informasaun ne’ebé kredivel no firmi defende media no jornalista iha situasaun ameasa nia laran.
Esplika liután Konselhu Imprensa louva ba asosiasaun jornalista sira ne’ebé rapidamente responde lalais kedas ba insidente refere ho deklarasaun no pozisaun ne’ebé ejiji responsabilidade husi autor sira ne’ebé komete ofensa intergirdade fizika hasoru journalist SAPNEWSTL iha Kampus UNDIL, espera insidente refere sei la akontese tan iha futuru
Reportajen : Domingas
Foto : Domingas