Malázia, 27 Outubru 2025 (Média Democracia) – Momentu istóriku, Timor-Leste (TL) partisipa bá dala uluk iha Simeira Association of Southeast Asian Nations (ASEAN) bá dala-47 ho tema “Inkluzividade no Sustentabilidade” hafoin ofisialmente adere nu’udár Estadu membru bá dala-11 iha Sentru Konvensaun Kuala Lumpur (KLCC), domingu (26/10/2025). Informasaun hirak ne’e Media asesu husi pajina ofisial Primero Ministru, segunda semana ne’e.
Primeiru-Ministru (PM), Kay Rala Xanana Gusmão konsidera ida-ne’e hanesan onra ida atu dirije Simeira ASEAN istóriku bá dala-47 nu’udár membru ofisiál plenu ida husi família ASEAN nian.
Marku ida-ne’e marka kapítulu foun ida, la’ós de’it bá Timor-Leste, maibé bá integrasaun rejionál ne’ebé harii iha konfiansa, solidariedade no kompromisu fahe bá futuru komún. Xanana Gusmão hato’o Timor-Leste ninia apresiasaun bá Malázia, bá lideransa ezemplár nu’udár Prezidente ASEAN nian iha 2025, hodi dirije Timor-Leste ninia deliberasaun sira bá adosaun Vizaun Komunidade ASEAN nian 2045.
Tuir tema orientadór “Inkluzividade no Sustentabilidade,” Timor-Leste fó hanoin katak, forsa ASEAN nian hela iha diversidade ho inkonsibilidade, konstrusaun no Timor-Leste nia konxiénsia atu atua ho koletivu. Timor-Leste apoia maka’as ambisaun vizaun ASEAN nian bá rejiaun ne’ebé define ho reziliénsia, inovasaun no inkluzividade.
“Ami rekoñese ASEAN nia foku estratéjiku ba armonizasaun padraun komersiu nian integrasaun finanseira movimentu ema hodi halo ita-nia rejiaun sai ponte ekonomiku global ida iha tinan 2045.” Dehan Primero Ministru Kayrala Xanana Gusmão
PM hatutan, Timor-Leste, taka lakuna dezenvolvimentu nian sai hanesan prioridade prinsipál ida. Timor-Leste enkoraja ASEAN atu kontinua no haburas iha inisiativa bá Integrasaun ASEAN, hodi apoia paridade, kapasitasaun no solidariedade rejionál. Timor-Leste fó apoiu bá inisiativa sira ASEAN nian bá integrasaun ekonómika ne’ebé kle’an liután, liu-liu liu-husi ATIGA ne’ebé hadi’a ona, Akordu Enkuadramentu Ekonomia Dijitál no Rede Enerjia ASEAN nian.
Iha aliñamentu ho ajenda klimátika ASEAN nian, Timor-Leste kompromete atu avansa enerjia renovável no dezenvolvimentu sustentável, hodi rekoñese dezafiu úniku sira ne’ebé Estadu ki’ik sira hasoru.
“Ami elojia esforsu sira ne’ebé hala’o hela atu atinji kodigu konduta ida ne’ebé legalmente vinkulativu iha tasi sul Xina nain, hodi mantein rejiaun hanesan Jona dame nian.” Hatutan Primeru Ministru
Primeru Ministru afirma, Timor-Leste lori esperiénsia prátika bá ASEAN kona-bá rekonsiliasaun no harii dame no iha kompromisu atu kontribui bá rejiaun nia seguransa no lideransa umanitária.
“Lori Governu no povu Timor-Leste nia naran ha’u hato’o agradesementu kle’an ba konfiansa no solidariedade ne’ebé Estadu membru ASEAN hotu-hotu hatudu iha ita-nia viajen ba adezaun tomak.” Haktuir Primeiru Ministru
PM hato’o mós parabéns no dezeju di’ak sira bá Filipina bainhira asume Prezidente ASEAN nian iha 2026. Timor-Leste hein atu servisu hamutuk besik-liu, hodi avansa Vizaun 2045 ASEAN nian ho objetivu sira ne’ebé fahe bá Sudeste Aziátiku ida ne’ebé forte-liu, unidu no reziliente.
Iha okaziaun ne’e Kay Rala Xanana Gusmão hato’o sinseru kondolénsia bá Família Reál no povu Tailándia kona-bá Majestade Liurai-feto Sirikit, Liurai-feto Inan nia mate. Simeira ASEAN bá dala-47 ne’e prezide husi Primeiru-Ministru Malázia, Dato’ Seri Anwar Ibrahim ne’ebé fahe bá sesaun Plenária no Retiru.
PM relata tan, sesaun Plenária involve mós partisipasaun Konvidadu sira husi Meza ASEAN nian, nomeadamente, Primeiru-Ministru Kanadá, Prezidente Konsellu Europeu no Diretór Jerente Fundu Monetáriu Internasionál (FMI). Durante Sesaun Plenária, Líder ASEAN sira konsentra sira-nia diskusaun bá asuntu sira ne’ebé relasiona ho harii Komunidade ASEAN no relasaun esterna ASEAN nian.
“Líder sira mós delibera kona-bá dalan sira atu aprofunda integrasaun rejionál, estimula kreximentu ekonómiku no hasa’e konetividade ASEAN nian. Kona-bá relasaun esterna sira, Líder sira diskute esforsu sira atu reforsa unidade no Sentralidade ASEAN nian, no hametin kompromisu ASEAN nian bá órden multilaterál ida ne’ebé bazeia bá regra sira iha paizajen jeoestratéjiku globál ne’ebé evolui daudaun. Kanadá ho Uniaun Europeia (UE) mós fahe sira-nia perspetiva kona-bá konsolidasaun no aprofunda liu-tán sira-nia relasaun diálogu ida-idak ho ASEAN.” PM afirma
PM informa, iha oakziaun ne’e The International Monetary Fund (IMF) fó informasaun bá Líder sira kona-bá avaliasaun makroekonómiku globál sira ikus-liu husi FMI, implikasaun polítika sira bá ASEAN no dalan sira atu aprofunda kolaborasaun entre FMI-ASEAN. Durante Sesaun Retiru, Líder sira halo revizaun bá implementasaun Konsensu Pontu Lima (5PC) kona-bá Myanmar no dalan bá oin hodi rezolve krize polítika no umanitária iha nasaun ne’e, nomos troka hanoin kona-bá asuntu rejionál ho internasionál sira ne’ebé sai preokupasaun mútua.
Esplika liután partisipa iha Simeira ASEAN bá dala-47 maka líder xave sira Sudeste Aziátiku hanesan Primeiru-Ministru Malázia, Datuk Seri Anwar Ibrahim, Sultaun no Primeiru-Ministru Brunei Darusalam, Sultan Hassanal Bolkiah, Primeiru-Ministru Kamboja, Hun Manet, Prezidente Repúblika Indonézia, Prabowo Subianto, Primeiru-Ministru Laos, Sonexay Siphandone, Prezidente Filipina, Ferdinand Marcos Jr, Primeiru-Ministru Singapura, Lawrence Wong, Primeiru-Ministru Tailándia, Anutin Charnvirakul, Primeiru-Ministru Vietname, Pham Minh Chinh, Prezidente Repúblika RDTL, José Ramos-Horta ho Primeiru-Ministru Kay Rala Xanana Gusmão.
Aleinde ne’e partisipa mós husi parseiru internasionál sira ne’ebé reflete organizasaun ASEAN nia parseria globál mai-husi Prezidente Estadus Unidus, Donald Trump, Primeiru-Ministru Xina, Li Qiang, Primeiru-Ministru Japaun Sanae Takaichi, Prezidente Brazil, Luiz Inácio Lula da Silva, Primeiru-Ministru Índia, Narendra Modi partisipas virtual, Prezidente Korea Súl, Lee Jae-myung, Prezidente Áfrika-Súl, Cyril Ramaphosa, Sekretáriu-Jerál ONU nian, António Guterres, Diretora Jerál FMI, Kristalina Georgieva, Prezidente Konsellu Europeu, António Costa, Vise-Prezidente Banku Mundiál bá Ázia Leste no Pasífiku, Carlos Felipe Jaramillo, Prezidente FIFA, Gianni Infantino no konvidadu sira seluk.
Reportajen : Nelfiano
Foto : Media Primero Ministru