Dili 05 Novembru 2024 (Media Democracia) – Negósiante Nenita Martina da Silva deside muda fatin husi merkadu manleuana mai fa’an sasan iha estrada ninin kampung-baru maske Guarda Munisípiu Dili mai duni beibeik maibé nafatin fa’an nune’e bele hetan osan hodi reforsa ekonomia familia
Tuir negósiante Nenita Martina da Silva hateten, durante ne’e fa’an sasan hanesan modo tahan iha merkadu manleuana maibé haree ba situasaun daudaun ne’e SEATOU muda negósiante barak ba iha ne’ebá entaun hamosu sasan la folin tanba vendedor barak liu komprador
“Ha’u mai husi Munisípiu Viqueque Postu-Administrativu ossu Nahareka daudaun ne’e hela iha Manleu. Ha’u nia atividade loron-loron mak halo negósiu hanesan fa’an modo tahan iha merkadu manleu, maibé dadaun ne’e sasan la folin ona hanesan tempu uluk, tanba ema barak mak estadu muda ba halo negósiu iha Merkadu Manleu, entaun ha’u deside tenke lori sasan mai fa’an iha kampung-baru nune’e fasil ba ema bele hola lalais.” Dehan negósiante Nenita Martina da Silva
Nia hatutan daudaun ne’e mantein fa’an sasan iha kampung-baru maibé hafuhu malu Guarda Munisípiu Dili, entaun tenke fa’an sasan iha oras ne’ebé guarda Munisípiu la halo vijilansia tanba Guarda Munisípiu Dili hetan sempre estaraga hotu sasan
“Loron ne’ebé durante ne’e Guarda Munisípiu Dili mai halo vijilansia mak komesa husi segunda too sesta feira sira halo vijilansia husi tuku 8.00 dader too tuku lima 5.00 lorokraik entaun ami negósiante labele ba fa’an sasan iha estrada boot, ami tenke fa’an subar iha estrada kiik karik ami fa’an iha estrada boot sira hetan sempre estraga ami nia sasan. Loron ne’ebé ami fa’an sasan husi dader too lorokraik mak sabadu ho domingu ne’e Guarda Munisípiu Dili mai halo vijilansia, ne’ebé karik sira mai ami hatene dalaruma mós tuir nia tempu de’it.” Dehan nia
Nia salienta liután katak dalaruma sente triste tanba Guarda Munisípiu Dili sempre mai estragu sasan entaun sasan folin la hanesan husi segunda too sesta dalaruma hetan $50 lae 60 dolar, karik iha loron sabadu no domingu dalaruma bele hetan too $100 dolar liu tanba fa’an husi dader too lorokraik
Esplika liután katak maske Guarda Munisípiu Dili sempre mai duni beibeik maibé hanesan negósiante dalan ninin nafatin esforsu hodi halo negósiu, nune’e bele hetan osan ituan hodi sustenta ba ekonomia familia no haree oan sira nia eskola. Atividade negósiu ne’ebé nia halo la sente kolen no baruk atu luta ba nesesidade uma laran, maske ho esforsu ne’ebé todan ida ne’e la sai hanesan obstaklu ba moris loron-loron nian.
Reportajen : Nelfiano
Foto : Nelfiano