Dili, 30 Outubru 2025 (Média Democracia) – Atu marka Loron Mundiál ba Ai-han 2025, Marfing Global Food Company MBRF selebra hamutuk ho parseiru sira, hanesan WFP, UNICEF, Maluk Timor, Esposa Embaizadór sira, komunidade lokál sira no estudante sira iha Kantina Matak Dili, hodi promove importánsia nutrisaun ho balansu nian, kombina ai-horis ne’ebé saudavel, proteína no grupu ai-han esensiál sira ba labarik ne’ebé forte no saudavel liu ho ninian tema “Promove Nutrisaun Saudavel no Balansu ba Ema Hotu.”
Iha diskursu Representante MBRF Lita Flora Amaral hateten, Loron Mundiál Ai-han fó hanoin ba ema hotu katak ai-han nutritivu no balansu maka xave ba ema nia moris-di’ak no reziliénsia komunidade nian. Iha Timor-Leste, MBRF hili slogan “Hahán Saudavel – Familia Saudavel” hodi apela ba uma kain sira nomos atu hanorin ba labarik no estudente sira kona-ba importánsia hahán saudavel nian.
“Selebrasaun iha Dili sei iha kompetisaun tein kona-ba na’an sate-manu ne’ebé di’ak liu, demonstrasaun tein nian no diskursu kona-ba nutrisaun ne’ebé enkoraja família sira atu hili hahán saudavel uza ingrediente lokál, baratu, hamutuk ho proteína ho kualidade-aas hanesan MBRF nia produtu Sadio, Borella, Sadix no Pedigão. MBRF apoia inisiativa ida-ne’e hanesan parte ida husi nia kompromisu ba edukasaun ai-han, sustentabilidade no moris-di’ak ba futuru jerasaun sira.” Dehan Representante MBRF Lita Flora Amaral
Nia hatutan, liuhusi serbisu hamutuk ho Governu, setór privadu no sidadaun sira, Timor-Leste bele promove seguransa ai-han no nutrisaun ba ema hotu, hodi asegura katak labarik ida-idak sai forte no família ida-idak iha asesu ba ai-han ne’ebé seguru no nutritivu.
“MBRF hanesan empreza ai-han ida-ne’ebé boot iha mundu, iha rai 117 ho sira-nia marka ikónika sira hanesan Sadia, Perdigão, Qualy, Banvit no Bassi, ho hahán proteína ida-ne’ebé inklui na’an karau, fahi no manu, produtu prosesadu sira, hahán prontu, no ai-han ba animál doméstiku. Kompaña ne’e iha funsionáriu 130,000 no produz produtu ho tonelada millaun 8 kada tinan, atinji ona kliente liu 424,000 no konsumidór millaun resin iha mundu tomak.” Hatutan Lita Flora Amaral
Rekoñesidu ba ninia prátika sustentável sira, MBRF mantein inisiativa pioneiru sira hodi prezerva ambiente no rekursu naturál sira. MBRF iha istoria iha inovasaun no lideransa nian, akompaña tendénsia no ábitu konsumidór sira nian no oferese portofolio produtu ne’ebé luan no integradu liu iha merkadu. Iha Timor-Leste, bele sosa produtu MBRF nian iha Leader, LITA, Leader Hymermart no LITA Cold Storage.
Reportajen : Domingas
Foto : Domingas