Dili, 31 Outubru 2025 (Média Democracia) – Sekretáriu Estadu Asuntu Toponímia no Organizasaun Urbana (SEATOU), lidera ekipa konjunta hodi enkontru ho komunidade afetadu um-kain sanulu kona-ba rai ne’ebé Terras e Propiadades atribui ona ba Instituisaun Servisu Nasionál Intelijênsia (SNI) hodi harii sira ninia Edifísiu, iha Suku Bairopite. Informasaun ne’e Media Democracia asesu husi pajina SEATOU Kinta semana ne’e.
Sekretária Estadu Asuntu Toponímia no Organizasaun Urbana Germano Santa Brites Dias hateten, Governu fó atensaun hodi bolu afetadu hotu tur hamutuk ho objetivu atu fahe informasaun no rona preokupasaun husi komunidade Laloran sira ba prosesu levantamentu dadus ne’ebé sei kona uma no ai-horis sira, antes ne’e, komunidade afetadu sira hetan ona notifikasaun no avizu kona-ba prosedimentu tomak.
“SEATOU hetan karta despaxu husi Gabinete Primeiru-Ministru halo koordenasaun ba planu levantamentu dadus no prosedimentus nesesáriu ho entidades kompetente hodi solusiona kona-ba atribuisaun rai estadu husi Terras e Propiadades ba Instituisaun Servisu Nasionál Intelijênsia (SNI) ne’ebé tutela direta bá Gabinete Primeiru-Ministru, ne’ebé daudaun okupa hela husi komunidade sira iha aldeia Laloran, suku Bairropite.” Dehan Sekretáriu Estadu Asuntu Toponímia no Organizasaun Urbana, Germano Santa Brites Dias
Sekretariu Estadu informa ba afetadu sira atu koopera ho ekipa konjunta bainhira tun ba rekolla dadus iha terrenu, tanba estadu presiza halo dezenvolvimentu hodi harii edifísiu ba SNI, levantamentu dadus ne’e rasik sei hahú loron aban, 29 Outubru 2025 to’o remata. Husu ba afetadu sira tenke fó informasaun ne’ebé loloos no prepara dokumentus hodi kompleta dadus, ba rai privadu tenke hatudu provas ho dokumentus sertifikadu titulu nain ba rai.
Esplika liután relasiona ho enkontru ne’e hala’o iha Sede suku Bairropite, hetan prezensa husi Reprezentante Gabinete Primeiru-Ministru, Ministeriu Obras Públicas, Ministériu da Agricultura, Pecuária, Pesca e Florestas (MAPPF), Diretor Nasional Terras e Propiadades, Sefe Suku Bairro Pite no komunidade afeitadu sira.
Reportajen : Nelfiano
Foto : Media SEATOU