Dili, 04 Novembru 2025 (Média Democracia) – Prezidente Republika José Ramos-Horta, lori povu Timor nian naran hato’o ninia sentidu tristeza profunda ba falesimentu Sua Majestade Liurai-feto Sirikit, Inan Liurai-feto Tailándia nian ne’ebé fila hikas ba aman Maromak nia kuana Santo iha loron 31 fulan outobro tinan 2025.
Prezidente Ramos-Horta haruka ona mensajen kondolénsia formál ida ba Sua Majestade Liurai Maha Vajiralongkorn, Família Reál, no povu Reinu Tailándia nian, hodi hato’o simpatia no solidariedade profunda husi povu Timor-Leste.
Iha ninia mensajen formal, Prezidente Ramos-Horta hateten, Sua Majestade Liurai-feto Sirikit Inan Liurai-feto sei hanoin hikas la’ós de’it ba ninia prezensa no elegánsia nobre, maibé liuliu ba ninia kompromisu ne’ebé la kole atu hadi’a moris-di’ak komunidade rurál sira-nian, fó kbi’it ba feto sira, no prezerva arte no tradisaun kulturál Tailándia nian, nomos ba ninia papel maternal nu’udar fonte inspirasaun no unidade ba nasaun, nia ezemplu sei kontinua fó naroman ba jerasaun sira iha futuru.
Prezidente Ramos-Horta konklui nia mensajen ho orasaun ba Família Reál no povu Tailándia nian, hodi dezeja sira konsolasaun no serenidade durante períodu lutu nasionál ida-ne’e.
Prezidente hato’o nia esperansa katak memória husi Sua Majestade Liurai-feto Sirikit Inan Liurai-feto sei dura nu’udar símbolu domin, servisu, no dedikasaun ba Reinu no ninia povu.
Reportajen : Komunikadu PR
Foto : Media PR