Dili, 05 Novembru 2025 (Média Democracia) – JSMP Timor-Leste realiza komunikadu imprensa hodi kongratula feto hotu-hotu ba selebrasaun Loron Feto Nasionál “Presiza kolaborasaun parte hotu hodi garantia feto sira moris dignu no livre husi violénsia. Komunikadu ne’e Media Democracia asesu husi pajina JSMP Kuarta semana ne’e.
Diretora Ezekutiva JSMP, Ana Paula Marçal iha komunikadu hateten, kada tinan iha loron 03 Novembru, selebra nu’udar Loron Nasionál ba Feto Timor-Lesto. Loron ne’e, nu’udar loron importante ba feto hotu iha Timor-Leste, tanba hatu’ur loron ida ne’e hanesan Loron Nasionál.
“Kompromisu ida ne’e, hatudu katak Estadu Timor-Leste, rekoñese importánsia husi kontribuisaun, papél no partisipasaun feto nian iha kontestu hari’í no dezemvolvimentu nasionál. Tema ba komemorasaun tinan ida ne’e mak “Feto Timor-Leste Selebra Ó Nia Direitu Igualdade no Oportunidade.” Dehan Diretora Ezekutiva JSMP Ana Paula Marçal
Diretora Ezekutiva hatutan komemorasaun ne’e atu fó hanoin fila-fali ba ita hotu katak, feto ninia direitu ba igualdade no oportunidade importante tebes iha dezenvolvimentu nasaun nian, maibé iha realidade feto no labarik feto barak mak sei nafatin moris iha dizigualdade nia laran, mezmuke iha ona mudansa balun hodi fó oportunidade ba feto sira atu bele lidera, organiza no mós foti desizaun.
“JSMP kongratula feto hotu-hotu iha loron espesial ida ne’e no hakarak hato’o ba publiku katak atu garantia igualdade no oportunidade ba feto. no labarik feto sira no laiha tan diskriminasaun ho forma violénsia oioin presija kolaborasaun parte hotu nian hodi halakon diskriminasaun ne’ebé sei kontinua akontese ba feto no labarik feto sira, nune’e feto no labarik sira iha oportunidade ba moris ida ne’ebé dignu, livre husi violénsia tantu iha família, komunidade, iha eskola sira no fatin neʼebé sira servisu ba.” Hatutan Diretora Ezekutiva JSMP
Diretora Ezekutiva afirma, mezmu ke iha ona lei nomos oportunidade barak mak asegura feto sira nia direitu maibé infelizmente feto no labarik feto barak mak sei nafatin hetan diskriminasaun no violénsia oioin. JSMP kongratula feto hotu-hotu ba selebrasaun Loron Feto Nasionál “Presiza kolaborasaun parte hotu hodi garantia feto sira moris dignu no livre husi violénsia.
“Bazeia ba rezultadu monitorizasaun JSMP nian iha Tribunál Judisiál Primeira Instánsia Dili, Suai, Baukau no Oekusi husi Outubru 2024 to’o Setembru 2025, husi totál kazu 646 ne’ebé JSMP monitoriza kazu Violénsia Bazeia ba Jéneru (VBJ) hamutuk 482 kazu no kazu ho tipu seluk 164 kazu. Ne’e hatudu katak feto no labarik feto sira mak kontinua moris iha violénsia nia laran. JSMP mós deskobre katak, maioria kazu sira ne’ebé rejista no julga iha tribunál sei kontinua domina husi kazu neʼebé asosiadu ho VBJ.” Diretora afirma
Esforsu barak maka Governu, Organizasaun Sosiedade Sivil no Ajensia Internasionál sira halo hodi luta kontra violénsia hasoru feto no labarik feto sira iha Timor-Leste, maibé violénsia hasoru feto no labarik feto kontinua aas no iha kazu balun to’o halakon feto no labarik foto nia vida.
Esplika liután JSMP kontinua ezije ba entidade tulela, instituisaun relevante sira iha setór justisa no sosiedade tomak, atu preve ninia estratéjia no esforsu sira ne’ebé halo durante dekade ida ne’e ho asegura esforsu no intervensaun sira orientadu ba nesesidade ba prevensaun jerál violénsia hasoru feto iha sosiedade.
Reportajen : Nelfiano
Foto : Media JSMP