Dili, 06 Novembru 2025 (Média Democracia) – Centro Nacional Chega Instituto Publiku (CNC I.P) asina Akordu Servisu Hamutuk (ASH) ho Muzeu Memorial Munisipal Manufahi (MMMM 1912). hodi fó apoiu orsamentu hamutuk $ 14,192.00 Dólar Amerikanu. Atividade asina akordu ne’e hala’o iha Salaun GAO-CC, Antigo Comarca Balide.
Diretór Ezekutivu Centro Nacional Chega!I.P, Hugo Maria Fernandes hateten, Objetivu asina ASH ne’e mak atu apoiu orsamentu ba estabelesimentu Muzeu Memorial Munisipal Manufahi 1912, responde ba misaun Centro Nacional Chega! I.P nian, promove implementasaun rekomendasaun sira husi relatóriu final Comissão de Acolhimento, Verdade e Reconciliação (CAVR) no Per Memoriam Ad Spem (PMAS) relasiona ho institusionalizasaun memoria no promosaun direitus umanus.
“ASH ne’e sei hahu efetivu husi data ne’ebé asina no sei termina iha loron 31 dezembru 2025 bainhira benefisiariu sira submete ona relatóriu. Tuir dadus ne’ebé iha, Centro Chega!l.P estabelese ona Muzeu Memorial Munisipal 5 hanesan, Muzeu Memorial Munisipal Viqueque, Covalima, Aileu, Bobonaro no Manatuto. No aumenta tan Muzeu Memorial Munisipiu Manufahi hamutuk neen (6).” Dehan Diretór Ezekutivu Centro Nacional Chega!I.P, Hugo Maria Fernandes
Diretór Ezekutivu informa, Centro Chega!l.P estabelese Muzeu Memorial Munisipal hanesan mekanizmu ida atu halibur, habelar, no hakbesik narrativu sira kona-ba istória pasadu Timor-Leste nian, liu-liu ida-ne’ebé relasiona ho partisipasaun komunidade Munisipiu ida-idak nian durante periodu luta ba ukun rasik-an tinan 1974-1999.
“Muzeu Memorial Munisipal ne’e mós hanesan plataforma ida husi Programa Memorializasaun Integradu Centro Chega! IP nian ne’ebé mai ho objetivu atu sosiedade la repere fila-fali violensia pasadu liuhusi mekanizmu sira hanesan, harii plataforma ba ema no komunidade husi parte étniku-kulturál no politika sira atu fahe sira-nia istória no envolve komunidade iha diálogu no memorializasaun, prezerva memória istoriku liuhusi arkiva no dizemina narativa sira ba públiku, fasilita prosesu komprensaun komún kona-ba politika no programa sira oinsa mak utiliza memória istoriku sira.” Informa Diretór Ezekutivu Centro Nacional Chega!I.P
Nia konklui, Dijitaliza narativas hirak ne’ebé nesesariamente atu dijitalizadu hodi aliña ho objetivu sira. Objetivu prinsipál husi estabelesimentu Muzeu Memorial Munispal mak, disponibiliza no prezerva dokumentu istoriku violasaun direitus umanus periodu 1974-1999, fasilita informasaun kona-ba istória pasadu ba públiku liu-liu istoria komunidade munisipal nian, sai sentru aprendizajen kona-ba paz, justisa no direitus umanus, sai mós nu’udar referensia istorika ba peskizador sira no sai espasu reflesaun ba memoria passadu.
Reportajen : Domingas
Foto : Media CNC