Dili, 06 Novembru 2025 (Média Democracia) – Prezidente Republika José Ramos-Horta hato’o ninia sentidu kondolénsia profundu ba Sua Majestade Liurai Charles III husi Reinu Unidu Grã-Bretanha no Irlanda Norte nian, hafoin atake violentu ne’ebé akontese iha komboiu ne’ebé hala’o viajen entre Doncaster ho Londres, hamate no hakanek ema barak nia vida. Atake ne’e akontese iha loron 5 fulan Novembru tinan 2025.
Iha mensajen formál, husi Prezidente Republika José Ramos Horta hato’o ninia profunda tristeza kona-ba akontesimentu trájiku ne’e.
“Iha momentu tristeza ida-ne’e, ha’u hato’o ba Vossa Majestade, no liuhusi ita-boot ba família vítima sira-nian, ha’u-nia kondolénsia profunda no sentimentu solidariedade. Ha’u hakarak mós fó omenajen ba membru pesoál ferroviáriu sira, pasajeiru sira, forsa seguransa sira ne’ebé ho aten-barani no laran-luak, atua hodi proteje moris sira no trava asaltante. Sira-nia asaun eroiku ne’e refleta valór di’ak liuhusi umanidade no servisu públiku ne’ebé inspira povu britániku.” Dehan Prezidente Republika José Ramos Horta
Prezidente reafirma, Timor-Leste nia solidariedade fraterna ho Reinu Unidu hodi kondena aktu violénsia ne’ebé laiha sentidu ne’e.
Prezidente Republika konklui Timor-Leste hamriik hamutuk ho família afetadu sira hotu no hamutuk ho sira ne’ebé rekupera husi kanek fíziku no emosionál ne’ebé kauza husi trajédia ida-ne’e.
Reportajen : Komunikadu PR
Foto : Media PR