Dili, 07 Novembru 2025 (Média Democracia) – Sekretária Estadu ba Igualdade (SEI), halo kolaborasaun ho ESCAP no UN Women, lansa ona Konsulta Nasional ida durante loron tolu kona-ba Avaliasaun no Investimentu iha Ekonomia Kuidadu iha 30 Setembru to’o loron 2 Outubru 2025 iha Dili hodi hametin asaun nasionál kona-ba kuidadu, igualdade jéneru no dezenvolvimentu sustentavel. Komunikadu ne’e Média Democrcaia asesu husi pajina S.E.I Kinta Semana ne’e.
Sekretária Estadu ba Igualdade, Elvina Sousa Carvalho iha sesaun abertura hateten, kuidadu no tenke rekoñese hanesan sentrál ba progresu sosiál no ekonómiku iha rai laran nune’e bele dezenvolve iha future.
“Ita tenke haree ba sosiedade no ekonomia nia laran. Investimentu iha kuidadu la’os de’it imperativu morál, maibé estratéjia dezenvolvimentu ne’ebé matenek atu asegura ita-nia nasaun bele funsiona ho di’ak.” Dehan Sekretária Estadu ba Igualdade-SEI, Elvina Sousa Carvalho
Sekretária Estadu hatutan, haree ba sosiedade ekonomia iha rai laran atu halo investimentu tenke kuidadu no marka estratéjia dezenvolvimentu ne’ebé matenek nune’e bele asegura nasaun ho di’ak atu labele hamosu failansu ruma iha futuru
Iha fatin hanesan Reprezentante UNICEF iha Timor-Leste, Koordenadora Rezidente ONU Ad Interinu, Patrizia DiGiovanni informa, esforsu ida-ne’e sei rekere kolaborasaun iha setór hotu-hotu entre liña Ministériu, ajénsia dezenvolvimentu, sosiedade sivíl no komunidade lokál sira. Ne’e sei presiza aproximasaun ida-ne’ebé komprensivu ba dezafiu sira ne’ebé infrenta.
“Ekipa Nasoins Unidas nian ida ne’e nu’udar prioridade ida ne’ebé fahe ba malu. Ajénsia ONU barak prontu atu servisu hamutuk ho instituisaun nasionál sira, sosiedade sivíl no parseiru dezenvolvimentu sira hodi asegura katak kuidadu ne’e rekoñese, hamenus, fahe fali, fó kolen no reprezenta.” Dehan Reprezentante UNICEF iha Timor-Leste Koordenadora Rezidente ONU Ad Interinu, Patrizia DiGiovanni
Reprezentante UNICEF iha Timor-Leste hatutan, konsulta ne’e marka lansamentu ofisiál husi parseria Governu Timor-Leste nian kona-ba ekonomia kuidadu no estudu kazu nasionál konjunta ne’ebé dezenvolve ona ho Institutu Estudu Dezenvolvimentu (IDS).
Konsultasaun Nasional ne’e ko’alia liu kona-ba Timor-Leste nia vontade polítika ne’ebé forte no vizaun ba oin atu harii sistema kuidadu inkluzivu, ekuitativu no sustentável ida, hodi kontribui ba kompromisu sira nasaun nian tuir Ajenda Dezenvolvimentu Sustentável tinan 2030 nian no planu servisu rejionál ASEAN nian ne’ebé emerjente kona-ba ekonomia kuidadu nian.
Esplika liután eventu ne’e konvoka partisipante sira ne’ebé reprezenta Ministériu sira, organizasaun sosiedade sivíl sira, parseiru dezenvolvimentu sira no akadémiku. Hamutuk esplora oinsá atu rekoñese di’ak liu, hamenus no fahe fali servisu kuidadu ne’ebé la selu no oinsá atu investe iha kualidade servisu kuidadu nomos infraestrutura sira ne’ebé suporta feto no mane, labarik no ferik-katuas sira.
Reportajen : Nelfiano
Foto : Media S.E.I