Dili, 17 Novembro 2025 (Média Democracia) – Ministériu Edukasaun hamutuk ho Sekretária Estadu ba Igualdade-SEI no Ministeriu relevante nomos Parseru dezenvolvimentu sira realiza lansamentu estratejia programa prevene protesaun ba Violénsia Bazeia ba Jéneru. Lasamentu ne’e hala’o iha Ian Martin Infordepe Matadoru no atividade refere Média Democracia asesu husi pajina Ministeriu Edukasaun, iha Segunda semana ne’e.
Ministra Edukasaun (ME), Dulce de Jesus Soares hateten, Ministériu Edukasaun iha koordenasaun no Sekretária Estadu ba Igualdade-SEI, Ministériu Solidaridade Sosiál no Inkluzaun, Ministériu Saúde, Ministériu Ensinu Superiór, Sekretária Estadu Igualidade, hodi halo lansamentu ba estratejia programa prevensaun no protesaun ba violénsia bazeia ba jéneru iha eskola, hanesan kontinuasaun husi implementasaun planu asaun nasionál violénsia bazeia ba jéneru ne’ebé lansa tiha ona.
“Programa ne’e laos foun, maibé hanesan esforsu ida atu kontinua reforsa hodi fó formasaun ba professor sira, Diretór eskola, Adjuntu, Superintendente, Inpetór no Mentór sira, nune’e ema hotu bele servisu hamutuk hodi garante no kombate atu bele proteje labarik sira husi asaun violénsia bazeia ba jéneru.” Dehan Ministra Edukasaun (ME) Dulce de Jesus Soares
Ministra Edukasaun hatutan, Programa ida ne’e sai hanesan komitmentu Governu Konstitusionál da-9 nian, atu kontinua reforsa no kombate violénsia bazeia ba jéneru iha eskola sira. Tuir planu, sei involve profesór hamutuk 14 mil husi eskola sira iha territóriu laran tomak.
Iha fatin hanesan Sekretária Estadu Igualidade, Elvina Sousa Carvalho hateten, onra boot mai hamutuk ho Ministériu Edukasaun atu halo lansamentu ba estratejia hodi reforsa kapasidade sistema edukasaun hodi proteje labarik no juventude sira no prevensaun Violénsia Bazeia ba Jéneru iha Timor-Leste.
“Ita presiza fó apresiasaun ba esforsu ne’ebé Ministériu Edukasaun halo, la’os ba iha lansamentu estratejia atu reforsa kapasidade sistema edukasaun nia de’it, maibé iha mós esforsu lubuk ida ne’ebé Ministériu Edukasaun halo, atu bele kontribui ba prevensaun Violénsia Bazeia ba Jéneru iha área edukasaun nian.” Dehan Sekretária Estadu ba Igualdade-SEI, Elvina Sousa Carvalho
Sekretária Estadu hatutan, nafatin fó apoiu ba inisiativa di’ak husi Ministériu Edukasaun hodi kontribui ba realizasaun estratejia ne’e, hanesan marka passu importante hodi tau hamutuk esforsu koletivu atu harii sosiedade ida ne’ebé seguru inkluzivu no respeita malu.
Esplika liután liuhusi lansamentu estratejia ida ne’e, tenki halo komitmentu ba-an rasik atu hanorin hodi lori jerasaun foun sira ne’e ba determina sira-nia futuru ho di’ak no seguru. Aleinde ne’e atividade refere partisipa husi Ministériu Edukasaun, Sekretaria Estadu ba Igualdade-SEI, Ministériu Solidaridade Sosiál no Inkluzaun nomos parseiru hotu.
Reportajen : Nelfiano
Foto : Media ME