Dili, 24 Novembru 2025 (Média Democracia) – Kazu Violensia Domestika aumenta-aas iha Munisipiu Baucau, tanba mane sira uza poder hodi ukun feto sira.
Tuir Mediku Jeral Hospital Horex Baucau, Mario Sarmento hateten, uluk seidauk harii-uma mahon ka uma seguru dala-barak ONG Pradet mak fó asistensia ba ema sira ne’ebé hasoru Violensia bazeia ba Jeneru ka violensia domestika.
“Iha tempo uluk uma seguru seidauk harii iha Baucau, ONG Pradet luta makas hodi fó asistensia ba maluk sira ne’ebé hasoru violensia bazeia ba jeneru, maibé agora daudaun ne’e apoiu husi Ministériu Saúde konsege kria uma seguru ida, nune’e iha hospital referal Baucau mós fó ona asistensia ba maluk sira sira ne’ebé mai ho violensia.” Dehan Mediku Jeral Mario Sarmento iha INSPTL Comoro
Mediku Jeral ne’e hatutan liután katak, liuhusi esforsu Ministeriu Saude nian ne’ebé harii uma seguru ne’e agora daudauk komunidade barak maka mai hato’o ka keixa akontesimentu ne’ebé sira hasoru iha sira nia moris.
“Hahu husi fulan janeiru to’o fulan novembru ita registu ona kazu violensia bazeia ba jeneru kuaze 20 ka 30 ba leten mai ho kazu tipu violensia fiziku, domestika, violensia hasoru labarik no violensia sexual.” Hatutan Mediku Jeral
Nia esklarese tan, dala-barak servisu kona-ba violensia bazeia ba jeneru ne’e laos parte saúde deit, maibé servisu entidade husi Polisia Nasional Timor-Leste no VPU, MSSI liu-liu ofiasial protesaun labarik, pradet no sira seluk ne’ebé haree ba kazu, liu-liu violensia bazeia ba jeneru iha Timor-Leste. Tanba ne’e kria ona rede referal ida bainhira iha Parte saúde nian sira atende ona sempre apoiu malu liu-liu iha rede referal sira atu fó asistensia ba maluk sira ne’ebé hetan violensia.
Kazu ho tipu ne’ebé aas liu iha Munisipiu Baucau mak violensia domestika, tanba dala-barak polisia no VPU sira lori mai ne’e kuaze violensia domestika, no kauza husi violensia domestika ne’e mai husi abuju de poder.
Reportajen : Tomas
Foto : Tomas