Dili, 03 Dezembru 2025 (Média Democracia) – Xefe Kaza Sivíl, Jesuína Maria Ferreira Gomes, prezide Serimónia Abertura Promosaun Talentu Ema ho Defisiénsia, ne’ebé organiza husi Asosiasaun Ema ho Defisiénsia Timor-Leste (ADTL), iha Palásiu Prezidensiál Nicolau Lobato Dili. Diskursu ne’e Média Democracia asesu husi pajina PR Kuarta semana ne’e.
Iha ámbitu selebrasaun Loron Internasionál Ema ho Defisiénsia 2025, Xefe Kaza Sivíl hato’o diskursu ofisiál Prezidente Repúblika, José Ramos Horta. Iha diskursu aliña ho tema Nasoins Unidas nian “Haburas sosiedade inkluziva ba ema ho defisiénsia hodi hakat ba progresu sosiál.
Husu atu Timor-Leste avansa ba modelu ida ne’ebé garante autonomia, dignidade no partisipasaun tomak ba ema ho defisiénsia, hodi liu dependénsia esesiva ba apoiu asistensiál sira.
Prezidente Repúblika afirma, objetivu la’os de’it atu fó subsídiu, maibé kria kondisaun atu sidadaun sira ho defisiénsia hodi bele jere sira-nia moris ho independénsia totál husi ema seluk.
“Atu hasai barreira sistémika sira ita tenke liberta sira husi obstákulu, atu nune’e sira labele depende barak liubé kbiit maternál ka paternál, Governu ka Autoridade Nasionál sira.” Afirma Prezidente da Republika
Diskursu ne’e destaka mós esperiénsia pozitiva atleta Paralímpiku Timoroan sira-nian, ne’ebé haree ona sidade asesivel sira iha rai-liur. Iha sentidu ne’e, hodi husu ba Autoridade Lokál no Munisípiu sira atu adota padraun hanesan, hodi asegura seguransa no mobilidade di’ak liu iha Dili.
Iha diskursu ne’e, Prezidente reafirma mós kompromisu Timor-Leste nian ho Konvensaun Nasoins Unidas kona-ba Direitu Ema ho Defisiénsia (CNUDPD), hodi defende katak kompromisu ne’e tenke tradús ba asaun konkreta sira ne’ebé garante partisipasaun sívika no protesaun hasoru diskriminasaun.
Esplika liután iha diskursu Xefe Kaza Sivíl hato’o mós agradesimentu Prezidente nian ba parseiru prinsipál sira inklui Governu Austrália, Organizasaun Mundiál Saúde (OMS) no Ministériu Solidariedade Sosiál no Inkluzaun (MSSI) ba apoiu kontínua ba ADTL. Apelu mós mobilizadór ba setór hotu iha sosiedade, husi Munisípiu to’o empreza privada sira atu promove ambiente inkluzivu ida ne’ebé ema ho defisiénsia bele sai sidadaun ne’ebé haksolok, ativu no produtivu.
Reportajen : Nelfiano
Foto : Media PR