Dili, 05 Dezembru 2025 (Média Democracia) – Governu liuhusi Ministériu ba Asuntus Kombatentes Libertasaun Nasionál (MAKLN), realiza konferensia imprensa kona-ba pagamentu pensaun Veteranus ne’ebé sei akontese iha loron 15 Fulan Dezembru tinan ne’e. Konferensia refere hala’o iha salaun MAKLN, Comoro-Dili Kinta semana ne’e.
Ministru ba Asuntu Kombatentes Libertasaun Nasionál MAKLN, Gil da Costa Monteiro “Oan Soru” hateten, daudaun ne’e kalendariza ona atu halo pagamentu pensaun Veteranus nian bá Kombatente sira hamutuk na’in atus-neen (600) resin iha faze da-huluk nian iha loron 15 fulan-Dezembru tinan 2025.
“Kombatente sira ne’ebé atu hahú simu pensaun iha fulan-ida ne’e mai husi sira ne’ebé rejistadu iha segundu rejístu tinan 2009 nian, inklui sira ne’ebé ninia dadus pendente kedas iha primeiru-rejístu 2003 no 2005.” Dehan Ministru ba Asuntu Kombatentes Libertasaun Nasionál MAKLN, Gil da Costa Monteiro
Ministru hatutan, Veteranus sira ne’ebé atu hetan dadauk pagamentu husi Governu iha fulan ida-ne’e, inklui grau partisipasaun (3-7), (8-14), (15-19), (20-24) ho Mártir sira ne’ebé mate ho idade klosan durante funu bá libertasaun nasionál hahú husi tinan 1975 to’o 1999.
“Veteranus ne’ebé mate klosan barak liu, maibé daudaun ne’e iha ema atus-ida (100) resin mak tama hotu iha pensaun ne’ebé foin dadauk ami aplika ona. Ami mós hein tán lista iha loron hirak ne’e lori ba taka sai hela no ami halo hela kálkulu. Sé ida ne’e mai hotu, hamutuk atus-neen (600) resin. Entaun atus-neen resin mak sei halo pagamentu dahuluk iha Fulan-Dezembru tinan ne’e.” Hatutan Ministru ba Asuntu Kombatentes Libertasaun Nasionál MAKLN
Ministru esplika, pagamentu ba Kombatente sira ne’e sei hala’o ho fazeadamente faze dahuluk sei realiza iha MAKLN Diresaun Nasionál ba Pensaun no Subvensaun (DNPS) iha Comoro-Dili. Tuir dadus, ema sira ne’ebé durante ne’e simu hela pensaun, inklui dadus sira iha segundu-rejístu 2009 nian hamutuk rihun 43. Dadus ida-ne’e inklui pensaun oioin hanesan, balu sei hetan pensaun Vetaranu ho tinan 24, balu 15/19 no barak liu mak simu pensaun 8/14 ho pensaun sobrevivénsia.
Entertantu iha ne’e mós Prestasaun Pekuniária únika ne’ebé hanesan ohin mensiona iha ne’e, hamutuk 5 mill resin. Ne’e sei hetan mós direitu bá pretasaun pekuniária únika nian.
Esplika liután relasiona konferensia ne’e Ministeriu ba Asuntu Kombatentes Libertasaun Nasionál MAKLN iha loron 15 Fulan Dezembru sei halo pagamentu ba Veteranus 600 resin. Iha fulan ida-ne’e nia klaran hamutuk Millaun $49. Husi millaun $49 ne’e kotegória hanesan brutu no líkidu ne’e hamutuk milaun $44 resin total ($44.294,144,12).
Reportajen : Nelfiano
Foto : Media MAKLN