Dili, 10 Dezembru 2025 (Média Democracia) – Sekretariu Estadu Komunikasaun Sosial (SEKOMS) ho Embaixador Japão iha Timor-Leste nomos reprezentate UNDP hala’o sorumutu kona-ba projetu konstrusaun edifisiu foun Radio Televisaun Timor-Leste Rttl. Sorumutu ne’e hala’o iha Kofi Anan room Caicoli Dili, tersa semana ne’e.
Sekretariu Estadu Komunikasaun Sosial SEKOMS, Expedito Loro Dias Ximenes hateten, ohin realiza sorumutu hamutuk ho Embaixador Japão iha Timor Leste (TL) nomos reprezentante UNDP hodi haree kona-ba aprezentasaun husi maneje projetu nian konstrusaun edifisiu RTTL foun.
“Ita hotu hatene katak projetu konstrusaun ne’e sei atrazu oituan tanba iha prosesu ne’e haree liubá kompaña ida husi Indonesia mak manan projetu depois nia halo fulan tolu nia senti katak bee sae makaas no haree katak laiha kapasidade atu kontinua, nune’e nia desidi rezigna-aan husi projetu refere.” Dehan Sekretáriu Estadu Komunikasaun Sosial SEKOMS, Expedito Loro Dias Ximenes
Sekretariu Estadu hatutan, Governu Japão ho Governu TL hamutuk ho UNDP halo enkontru ida ne’e, atu bele kontinua fila-fali projetu konstrusaun edifisiu foun RTTL. Nune’e, ohin iha sorumutu ne’e sira mós hato’o katak, projetu ida ne’e daudaun dezeñu foun. Kompañia ne’ebé menan dezunu foun sei halo hotu iha fulan rua nia laran.
“Komesa ohin to’o Fulan Fevereiru 2026 hotu, sei mai aprezenta dezeñu refete depois ami sei haree fali, tanba iha diminuisaun oituan. uluk Governu osan iha atu halo andar haat, maibé ho situasaun rai Caicoli ho nia pezu husi andar 4 ne’ebé iha karik auguenta ho rai Caicoli nian iha, entaun sei diminui fila-fali ba andar tolu, maibé iha hela dezenu nia laran.” Hatutan Sekretáriu Estadu Komunikasaun Sosial SEKOMS
Sekretariu Estadu afirma, sei hahu konstrusaun fali iha Fulan Março 2026, tuir UNDP hanesan implementador ba projetu ne’e apoiu husi Governu Japão sei hala’o durante 16 mezes, hahu iha Fulan Março 2026 sei remata iha Fulan Setembru ka Outubru 2027. Governu Japão kontinua apoiu nafatin ba projetu ida ne’e, nia mós sei fó fali relatoriu ba Tokyo iha Governu Central Japão nafatin apoiu projetu refere.
“Ita haree ba dezeñu ne’e kontinua ho orsamentu ne’ebé iha konstrusaun ne’e montante $USD 4.4, daudaun ne’e haree ba konstrusaun nia osan ne’ebé mai husi Governu Japão ne’e total $5.9 dolares iha osan ne’e nia laran mós sei fó treinamentu ba jornalista sira, osan ne’e lidera husi UNDP.” Afirma Sekretáriu Estadu Komunikasaun Sosial SEKOMS, Expedito Loro Dias Ximenes
Sekretariu Estadu informa, dezeñu ba projetu ne’e iha Fulan Março no Fevereiru mak sei haree fila-fali rezultadu, depois iha Fulan Março sei kontinua. Projetu refere manan husi kompañia PT AMITAS husi Indonesia, nia mak sei halo dezeñu foun fali no tuir kontratu ne’ebé asina ona iha Fulan rua nia laran.
Iha fatin hanesan representante Residente UNDP Timor-Leste Katyna Argueta hateten, ohin realiza sorumutu ne’e koalia kona-ba projetu konstrusaun edifisiu foun RTTL, nune’e bele haforsa partisipasaun demokratika husi sidadaun sira-nian iha Timor-Leste.
“Projetu ne’e iha objetivu rua, ida fó formasaun ba jornalista sira hodi hetan koñesementu foun hodi bele halo servisu tuir funsaun jornalismu ho di’ak. No objetivu segundu mak hala’o konstrusaun ba edifisiu RTTL nian.” Dehan representante Presidente UNDP iha Timor-Leste Katyna Argueta
Reprezentate UNDP iha Timor-Leste hatutan, haree ba projetu ne’e iha faze dahuluk nian hasoru dezafiu lubuk ida no dezafiu hirak ne’e hetan ona nia solusaun. Daudaun ne’e UNDP hahu ona kontratu ba iha kompañia foun atu hahu dezeñu foun fila-fali ba iha edifisiu RTTL, depois kompañia hala’o nia servisu no projetu lao tuir nia orariu no bele kompeleta projetu ne’e tuir nia tempu.
“Ha’u hakarak hato’o agradese ba iha lideransa sira husi RTTL ba kolaborasaun di’ak ho UNDP ba projetu refere, nune’e mós hakarak apresia no agradese Governu Jepão ba komitmentu tomak liuhusi projetu ida ne’e nu’udar parte ida husi komitmentu ba iha dezenvolvimentu sustentavel iha Timor-Leste.” Hatutan reprezentante UNDP iha Timor-Leste
Iha sorin seluk Embaixador Japão iha Timor-Leste, Tetsuya Kimura hateten, hato’o apresiasaun kona-ba kooperasaun di’ak entre Governu Japão nomos Governu Timor-Leste.
“Ohin ami hala’o enkontru hamutuk atu diskuti kona-ba oinsa atu avansa projetu konstrusaun edifisiu RTTL foun iha futuru. Ha’u mós hanoin fila-fali kona-ba enkontru ida ohin nu’udar komprimisiu reprezentante Governu Japão kona-ba projetu refere.” Dehan Embaixador Japão, Tetsuya Kimura
Embaixador Jepão informa liga ho projetu konstrusaun edifisiu foun RTTL durante ne’e enfrenta dezafius barak kona-ba rai, maibé bazeia ba dezafius sira ne’e ohin loron diskuti oinsa atu rejolve dezafius hirak ne’e hodi hetan solusaun bele halo konstrusaun ba edifisiu foun RTTL nian.
Esplika liután Governu Timor-Leste liuhusi Sekretáriu Estadu Komunikasaun Sosial SEKOMS ho Governu Japão nomos UNDP iha Timor-Leste diskute kona-ba projetu konstrusaun edifisiu foun RTTL nian maske durante ne’e iha dezefiu barak maibè to’o ikus duni solusaun iha tempu badak nia laran sei harii edifísiu ba RTTL hodi halo servisu iha futuru.
Reportajen : Nelfiano
Foto : Nelfiano