Dili, 16 Dezembru 2025 (Média Democracia) – Prezidente Republika Timor-Leste José Ramos Horta halo deklarasaun imprensa kona-ba akontesimentu Atake Praia Bondi iha Sydney Australia. Deklarasaun refere Média Democracia asesu husi Pajina PR tersa semana ne’e.
Prezidente Republika José Ramos Horta hateten, iha deklarasaun ne’e senti hakfodak no triste ne’ebé kle’an bainhira simu notísia kona-ba atake trájiku ne’ebé akontese iha Praia Bondi Sydney, ne’ebé hamate ema inosente sira no ema barak hetan kanek, husi hahalok violénsia ne’ebé laiha sentidu.
“Hodi Povu Timor-Leste nia naran, ha’u hato’o ba Sua Exelénsia Governadora-Jerál Honorável Sra. Sam Mostyn AC, Governu no Povu Austrália, ami-nia sentimentu kondolénsia profunda ba vida sira ne’ebé lakon no solidariedade ho família enlutada sira no sira hotu ne’ebé afetadu husi hahalok aat ida-ne’e.” Dehan Prezidente Repúblika Timor-Leste José Ramos Horta
Prezidente Republika afirma, Timor-Leste kondena maka’as forma terorizmu, estremizmu no ódiu hotu-hotu, inklui antisemitizmu no reafirma kompromisu metin ba pás, toleránsia no respeitu ba malu entre povu sira.
“Ami sente triste tebes no hakarak espresa katak “Austrália maka sosiedade ida ne’ebé tolerante liu, diversu no multikulturál, atake ida ne’ebé akontese iha momentu observasaun relijioza nian, konstitui ofensa ida ba valór universál sira moris nian, dignidade umana, liberdade adorasaun nian no ko-ezisténsia pasifika entre komunidade sira. Iha momentu laran-susar ida-ne’e, ami partilla lutu Povu Austrálianu nian no reitera ami nia konfiansa iha reziliénsia husi instituisaun demokrátiku sira Austrália nian no ba kapasidade povu nian atu mantein unidu hasoru adversidade.” Afirma Prezidente da Republika
Esplika liután, hein katak memória vítima sira nian bele hetan onra no hein katak sira-nia família bele hetan kma’an, forsa nomos solidariedade durante periodu sofrimente profunda ida ne’e.
Reportajen : Nelfiano
Foto : Media PR