Dili, 24 Dezembru 2025 (Média Democracia) – Prezidénsia Repúblika, iha kolaborasaun ho IX Governu Konstitusionál, sai uma-na’in ba selebrasaun anuál “Natal ho Povu” iha Palásiu Prezidensiál Nicolau Lobato. Eventu ida-ne’e halibur komunidade oioin iha nasaun ho espíritu unidade durante tempu Natál nian. Informasaun hirak ne’e Media Democracia asesu husi pajina PR, Tersa semana ne’e.
Prezidente da Repúblika José Ramos-Horta hateten iha komunikadu, selebrasaun hahú iha loron 6 fulan-Dezembru ho abertura ba Espozisaun Prezépiu hodi hamoris fila-fali tradisaun Natál ne’ebé apresiada iha nasaun. Espozisaun Prezépiu, tradisaun ne’ebé metin ona iha fiar sarani kristaun nian, nu’udar espresaun profunda kona-ba espiritualidade, kreatividade no espíritu komunitáriu Timor-Leste nian.
Eventu prinsipál “Natal ho Povu” iha loron 22 fulan-Dezembru hahú ho festival família nian ne’ebé vibrante. Programa ne’e hatudu aprezentasaun kulturál husi grupu labarik no foin-sa’e sira husi eskola, orfanatu no projetu komunitáriu sira inklui Grupu Milagre, Grupu Biblioteka Prezidensiál no Eskola Portugés. Destake sira inklui dansa festivál, knananuk sira, desfile moda labarik nian no atividade gratuita sira hanesan pinta oin, jogu nomos artezanatu.
Parte daruak husi selebrasaun ne’e loke ho benvindu tradisionál simbóliku husi Prezidente José Ramos-Horta no Primeiru-Ministru Kay Rala Xanana Gusmão. Programa ne’e kontinua ho mensajen refletivu Natál nian no diskursu ofisiál husi Prezidente no Primeiru-Ministru.
Momentu xave ida maka projesaun ba dokumentáriu badak ida kona-ba servisu Prezidénsia nian hodi apoia komunidade rurál sira. Tuir fali ho abertura ofisiál ba feira Natál nian. Selebrasaun ne’e kulmina iha serimónia simbóliku fó prezente nian, iha ne’ebé Prezidente ho Primeiru-Ministru, aprezenta prezente sira ba labarik no reprezentante komunidade sira, hodi konklui ho atmosfera ksolok ida husi jantar hamutuk.
Espíritu festivál nian hetan amplifikasaun husi atuasaun muzikál sira husi artista sira inklui Tere Elizabeth, Banda Três Pass, no Vidigal Pinto, hamutuk ho segmentu interativu sira hanesan Kuiz Telemor.
“Bainhira ita tama iha tempu Natál, ha’u husu imi hotu atu haburas ita-nia sentidu komunidade nian, hakle’an liután ita-nia solidariedade, no hametin ligasaun família nian ne’ebé inkarna iha ita-nia nasaun nia espíritu loloos. Hamutuk, mai ita hakbesik ba sira ne’ebé presiza liu, atu nune’e ksolok Natál nian bele nakonu iha ita-nia komunidade nia let no hela iha Timor-oan hotu nia laran.” Dehan Prezidente Repúblika José Ramos-Horta
Prezidénsia hato’o ninia agradesimentu ba doadór no parseiru sira hotu ne’ebé ajuda halo selebrasaun ida-ne’e sai posivel. Sira-nia jenerosidade hasa’e apoiu ne’ebé fó ba komunidade no labarik sira durante tempu Natál ida-ne’e.
Esplika liután Programa “Natal Ho Povu” sai nu’udar testemuña ba kompromisu Prezidénsia no Governu nian hodi promove unidade nasionál, selebra kultura Timor-Leste nian no fahe bensaun sira Natál nian diretamente ho sidadaun sira ne’ebé sira serví.
Reportajen : Nelfiano
Foto : Media PR