Dili, 24 Dezembru 2025 (Média Democracia) – Mensajen Natal husi Prezidente Repúblika José Ramos-Horta hato’o ba Povu doben Timor-Leste ho kmanek Natal nian ne’ebe to’o ona mai ita-nia nasaun.
Prezidente Repúblika José Ramos-Horta iha mensajen hateten Natal mak tempu sagradu ida, tempu ne’ebé fuan sira iha mundu tomak hanoin hikas kona-ba mensajen forte ba humilde moris foun iha Belém, mensajen ida kona-ba naroman iha nakukun laran, kona-ba pás envez de konfrontu no kona-ba domin ba malu.
“Ha’u hato’o hau-nia votus kmanek no laran luak tebes ba imi hotu. Hein katak tempu ne’e lori ba imi pás, ksolok no esperansa ne’ebé metin ba nafatin. Ha’u atu ko’alia kle’an mós kona-ba ita-nia istória rasik no espíritu kolektivu. Ita mak nasaun ida-ne’ebé la’o tempu naruk iha nakukun laran, matadalan husi naroman fiar no esperansa nian ne’ebé metin ba loron-foun ida ne’ebé di’ak liu.” Dehan Prezidente da Republika José Ramos Horta
Prezidente Repúblika hatutan, iha tinan 2025 nia laran kontinua ita-nia viajen nu’udar povu ida de’it, hasoru dezafiu sira ho reziliénsia no selebra progresu ho unidade nia laran.
“Nu’udar imi-nia Prezidente, ha’u nia orasaun Natál nian ne’ebé boot liu maka atu unidade nasionál no pás ne’ebé dura no sai ita-nia fundasaun ne’ebé metin. Mai ita fó liman ba sira ne’ebé sente mesak, ajuda sira ne’ebé presiza no simu ema hotu ho laran nakloke, ne’e mak espíritu loloos Natál nian.” Hatutan Prezidente da Republika
Prezidente afirma, ba Timor-Leste nia oan sira, ne’ebé sira-nia ksolok hakonu ita-nia uma laran, hein katak imi-nia hamnasa kontinua sai lian ba ita-nia nasaun nia promesa. Imi mak ita-nia prezente boot liu hotu iha futuru. Ba ferik no katuas sira ne’ebé lori matenek ba ita-nia viajen naruk atu imi hetan onra no hale’u ho domin no respeita. Ba família Timoroan ida-idak atu imi-nia uma sira hetan bensaun kmanek hamutuk no gratidaun ne’ebé kle’an.
Iha tempu ksolok nian ida-ne’e mai ita halo orasaun besik liubá sira ne’ebé lori todan, sira ne’ebé moras, sira ne’ebé luta no sira ne’ebé triste, tanba lakon ema ne’ebé sira hadomi. Espera katak sira hetan konfortu iha sira-nia komunidade nia hamutuk no forsa foun iha esperansa ne’ebé tempu ida-ne’e reprezenta.
Bainhira haree ba Tinan Foun, mai lori ba oin naroman Natál nian. Husik ida-ne’e orienta ita-nia asaun sira ba justisa ne’ebé boot liu, kompaixaun ne’ebé kle’an liu, no dezenvolvimentu sustentável ba ema hotu. Hamutuk, mai ita kontinua harii Timor-Leste ida ne’ebé sidadaun ida-ida bele moris iha dignidade no pás nia laran.
Mensajen ne’e deseja ba imi hotu Natál ida ne’ebé nakonu pás kristu nian ne’ebé kle’an no Tinan Foun 2026 ne’ebé nakonu ho saúde, prosperidade no susesu komún. Maromak haraik bensaun ba imi ida-idak, Maromak haraik bensaun ba Timor-Leste. Boas Festas Natal.
Reportajen : Nelfiano
Foto : Media PR