Dili, 25 Dezembru 2025 (Média Democracia) – Sarani katolika Paroqiu Santo António Motael selebra misa Natal simu ho domin pas harmonia,
Iha Omilia Padre Pároku Parókia Motael Guilhermino da Silva hateten, maluk sarani doben sira hotu mak Jesus Cristu hadomi kalan ida ne’e laos kalan baibain laos kalan ida ne’ebé loron ida tan loron foun ida mai laos mós kalan ida iha ne’ebé buat hotu nabilan, kalan ida ne’e kalan santu no lulik. Kalan ida ne’ebé maromak kumpri nia promesa ne’ebé fó sai hori uluk husi wain ba wain husi otas ba otas ohin iha altar ida ne’e.
“Kalan ida ne’e maromak nia desizaun atu mai soi ema sai profeta oan, maromak tun mai hasoru ita ema no konvida ita atu sai ba nia horik fatin. Ita hamrik duni ona iha misteriu boot ida nia oin, misterius mundu rua hasoru malu lalehan ne’ebé tun mai rai no mundu ne’ebé maromak hiit sae ba lalehan.” Dehan Padre Pároku Parókia Motael Guilhermino da Silva
Amu Pároku hatutan, maromak la horik ona iha leten as ba la koalia ona husi lei agora ne’e, tanba tun iha isin halo an sai ema, tama iha ita ema kriatura iha fazilidade kaben no sala. Kosok-oan nia prezepiu iha bibi luhan ne’e maromak ne’ebé halo-an sai ema atu ema ne’ebé la folin no dignidade bele tau esperansa iha maromak nia domin.
“Ema nia kbiit laek halo ema laiha kbiit atu hetan maromak nia domin tan ne’e mromak rasik mai hasoru ema hodi fó naroman atu hetan dalan di’ak.” Hatutan Padre Pároku Parókia Motael
Padre afirma, profeta Izais hakerek dehan povu ne’ebé hela iha nakukun laran haree ona naroman boot ida, liafuan ne’e laos apenas profesia kona-ba tempu iha futuru maibé realidade ne’ebé hatudu sai ba ita iha kalan ida ne’e pekadu halakon ona naroman moris nian.
“Pekadu lori ita ba nakukun sala nian, pekadu lori ita liuhusi tauk laran ne’ebé kanek tan sala, nune’e ita moris iha presaun nia laran halo ita buka ksolok maibé ita nunka hetan ksolok lolos naroman ne’e mosu husi leten hodi hola ilas hanesan ema halo-an sai ema iha ema nia leet, ida ne’e mak Natal katak momentu naroman la dook tan ona husi ema iha leten as ba, maibé iha ona ita-nia moris laran.” Afirma Padre Pároku Parókia Motael Guilhermino da Silva
Padre Pároku subliña, maluk sira, maromak la haruka mai ho forsa poder no armada maibé mai iha forma kosok-oan ida nia-an, kosok-oan ida moris oan mane ida mai ita. Natal hatudu maromak nia lojika ne’ebé diferente ho ita ema lojika, bainhira ema kriatura buka salvasaun liuhusi forsa maromak hamosu salvasaun husi suavidavel. Bainhira ita ema hakarak iha liurai ida ne’ebé Valente, maromak mai hanesan kosok-oan ida ne’ebé plaziu, maromak lao tun mai atu bele foti sa’i ema kriatura ne’ebé monu.
“Evangellu Saun Lucas nian deskreve akontesimentu maromak tun mai rai ne’e simples tebes, maibé kle’an tebes maromak hatudu-an iha kosok-oan jesus nia rai hahoris iha liurai nia palasiu iha balada han fatin, iha bibi luhan laos nai ulun sira mak simu nia, maibé bibi atan sira mak simu nia, katak ema simples no kiik sira ema la sura mak simu nia. Iha kalan nakukun Belem nia silensiu hanesan maromak hakarak dehan ba ema, ha’u hakarak tama iha harmonia vulnerabilidade, ha’u la dook husi o nia deziravel, ha’u la tauk atu hatene o nia foer sira pekadu nian.” Subliña Padre Pároku Parókia Motael Guilhermino da Silva
Padre informa, Natal katak maromak hatan ba ema nia kondisaun mizeravel no vulneravel, tanba ne’e duni ezistensia Natal ne’e nu’udar selebrasaun maromak nia mizerikordia hanesan saun Paul afirma iha karta ba Titu rahun di’ak maromak nian ne’ebé soi ema bosu duni ona. Maromak mai laos tanba ema kriatura nian merese maibé maromak haraik tanba ema kriatura sira presiza salvasaun.
Esplika liután Mizerikordia eziste tanba iha sala bainhira laiha kanek la presiza kurativu nune’e Natal laos selebrasaun ita ema nia perfeisaun maibé selebrasaun maromak nia domin tun mai ita nia imprefesaun mehi nian. Maromak nia liafuan kalan ne’e konvida ita atu onesta ita-nia an.
Reportajen : Nelfiano
Foto : Nelfiano