Dili, 06 Janeiru 2026 (Média Democracia) – Primeiru-Ministru (PM), Kay Rala Xanana Gusmão apela bá ajente administrasaun Estadu tomak atu kurize erru sira ne’ebé komete iha tinan 2025 nune’e bele hadi’a iha tinan 2026 no husu atu servisu ho responsabilidade hodi serví povu no rai ne’e ho di’ak liután. Diskursu hirak ne’e Média Democracia asesu husi pajina PM, Tersa semana ne’e.
Primeiru Ministru Kay Rala Xanana Gusmão hateten, hodi fó-sai no apelu ne’e bainhira prezide serimónia isar Bandeira Nasionál semana da-huluk fulan Janeiru 2026, iha Palásiu Governu, Dili hodi husu ba funsionariu hotu atu kumpre servisu no husik erru iha 2025 nune’e tama ona 2026 tenke servisu ho responsabilidade.
“Tinan 2026 ne’e la’os fásil bá ita tanba ne’e ita buka kurize nafatin atu povu fiar katak hetan tiha ukun-an, oan sira ne’ebé ba servisu hanoin netik sira-nia moris, hanoin netik rai ne’ebé ema rihun atus ba atus fó tiha sira-nia vida la husu buat ida. Tinan 2026 mudansa, katak mudansa iha atitude, kompromisu iha buat hotu-hotu, nune’e povu bele senti katak sira-nia oan ne’ebé sai matenek, kaer servisu hanoin duni rai ida-ne’e, la’os hanoin de’it sira-nia-an no família.” Dehan Primeru Ministru Kay Rala Xanana Gusmão
Primeiru Ministru husu atu kurize erru sira tanba hafoin semana rua férias hodi festeza Natál tinan 2025 no tinan foun 2026, agora bá oin hahú fali servisu prinsipál, nu’udár sarani no Timoroan ne’ebé hetan responsabilidade tenke hanoin saida mak halo tiha ona. Ida-ne’e mak responsabilidade bo’ot bá servisu na‘in sira Estadu tomak iha tinan 2026.
Primeiru Ministru afirma, konsidera tinan 2026 importante tebes tanba sempre temi bebeik kona-bá halo korresaun bá administrasaun públika, tenke halo duni. Povu sei hadomi no respeita ajente administrasaun Estadu tomak bainhira hatudu servisu di’ak bá sira iha rai doben ida ne’e.
“Ha’u husu bá imi hotu, bá imi-nia responsável sira administrasaun tomak, tenke servisu ho di’ak, responsabilidade ho hanoin ida, objetivu ida servi rai no povu ida-ne’e. Husu imi nia kompromisu tomak. Fulan tolu mak laiha mudansa iha ita-nia hahalok no iha servisu laran entaun ita lalika iha tán serimónia hasa’e Bandeira Nasionál.” Afirma Primeru Ministru
Primeiru Ministru informa, iha kalan 31 Dezembru 2025, taka Kontra Jerál Estadu (KJE) presiza kurize, tanba iha fatin balun ezekuta 75% maibé iha fatin balun ezekuta de’it 50%, tanba ne’e tinan 2026 tenke kurize nafatin hodi halo di’ak liután servisu iha area ida-idak nian.
Esplika liután, partisipasaun isar Bandeira Nasionál refere marka prezensa funsionáriu sira husi Gabinete Primeiru Ministru, Gabinete Fronteira Marrítima no Terrestre, Vise Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Prezidénsia Konsellu Ministru, Ministériu Koodenadór Asuntu Ekonómiku (MKAE), Gabinete Vise-Ministru Asuntu Parlamentár, Sekretaria Estadu Igualdade (SEI), Sekretaria Estadu Komunikasaun Sosiál (SEKOMS), Komisaun Funsaun Públika (KFP), Sentru Nasionál Chega (CNC, sigla portugés), Inspesaun Jerál Estadu (IGE) no Institutu Defeza Nasionál (IDN).
Reportajen : Nelfiano
Foto : Média-GPM