Dili, 14 Janeiru 2026 (Média Democracia) – Komisáriu Autoridade Aduaneira Joanico Pinto dehan Rejiaun Administrativu Espesial Oe-cusse Ambeno RAEOA seidauk inklui iha Postu atendimentu fatin rua hanesan Postu Integradu Sakato no Oesilo iha atendimentu hela maibé seidauk atualiza tama iha sistema Autoridade Aduaneira nian iha nasional.
Komisáriu hateten, ho orientasaun Primeru Ministru nian iha tinan 2025 estruturasaun halo iha Oe-cusse, entaun selebrasaun aniversariu Autoridade Aduaneira nian sei selebra mós iha Oe-cusse.
“Selebrasaun aniversariu Autoridade Aduaneira ami sei halo iha Oe-cusse tanba durante ne’e ami hahú fó ona formasaun ba Oe-cusse oan iha tinan kotuk, nune’e ami kontinua forma pesoal ami nian ne’ebé destaka iha Oe-cusse. Nune’e Oe-cusse mós iha kolesaun reseita dadus sei integra hotu mai iha sistema ne’ebé ita adopta iha nasional.” Dehan Komisáriu Autoridade Aduaneira Joanico Pinto
Komisáriu Autoridade Aduaneira hatutan, selebrasaun aniversariu sei realiza iha Oe-cusse entaun dadaun ne’e ekipa Autoridade Aduaneira nian prepara hela hodi estabelese komisaun tomakonta ba selebrasaun ne’e iha loron 26 Fulan Janeiru tinan 2026.
“Atividade prinsipal boot tolu ne’ebé ami sei halo mak primeru ami sei halo sosializasaun ba lider komunitaria, sosiedade sivil, relijioza no inan aman sira ne’ebé hela besik fronteira kona-ba regras bainhira ita-nia komunidade sira komprende di’ak kona-ba regras sira uza dalan ida-ne’ebé la resmi ka ilegal, entaun sosilizasaun ne’e sei halo iha parte rua hanesan fronteira Sakato no Oesilo.” Hatutan Komisáriu Autoridade Aduaneira
Komisáriu Aduaneira afirma, iha sosializasaun importante tebes liu-liu ba inan aman sira bele intende didi’ak regras nune’e bele hatene kona-ba sasan sira ne’ebé bele lori no labele lori. ka lori sasan ruma tenke selu kustu ba estadu.
“Iha parte seluk ami sei halo servisu planu anual hotu kedas atu nune’e bele indentifika saida mak durante ne’e ita atinji ona no problema saida maka sei infrenta, nune’e liuhusi avaliasaun bele rejolve problema ne’ebé ita infrenta no failla iha tinan kotuk nian, nune’e tinan ida-ne’e servisu hotu bele lao ho kontroladu.” Afirma Komisáriu
Komisáriu informa tema prinsipal ba selebrasaun aniversariu Autoridade Aduaneira tinan ne’e iha loron 26 Fulan Janeiru hanesan “Refleta ba Kotuk Hateke ba Oin Hamutuk Avansa Nafatin” tanba iha kontextu tolu mak ekipa servisu na’in 10 resin reforma ona iha ema barak tama servisu iha Aduaneira ne’e desde 2000 mai to’o agora tinan 24 ona, entaun tenke reforma tanba kestaun idade avansadu.
Esplika liután Autoridade Aduaneira mós daudaun ne’e iha hela faze atu halo rekrutamentu ba funsionariu Aduaneira nian maibé sei presiza aktuliza kondisaun di’ak ituan, nune’e rekursu foun tama bele halo servisu di’ak hodi bele koileta osan barak liután no dezenvolve rai ida-ne’e.
Repotajen : Nelfiano
Foto : Nelfiano