Dili, 16 Janeiru 2026 (Média Democracia) – Ró Bibiloteka Flutuante internasionál Doulos Hope to’o iha Portu Dili pur volta tuku 10h40 otl tula ho turista hamutuk ema 100 mai ho nasaun diferente. Objetivu husi Ró refere mai atu loke feira livru ba públiku, entre loron 16 no 28 Janeiru 2026 iha Timor-Leste depois fila hikas. Ró refere to’o iha Portu Dili Kinta semana ne’e.
Diretór Nasionál Marketing Turizmu no Relasaun Internasionál, Edson Lopes hateten, vizitasaun husi Ró Doulos Hope mai Timor-Leste tanba servisu hamutuk ho Ministériu Turizmu no Ambiente no Ministériu sira seluk, liu-liu halo promosaun ba sítiu turístiku sira iha Timor-Leste nune’e atrai ema estranjeiru sira bele mai vizita.
“Loron aban atividade feira livru ne’e loke ofisialmente ba públiku no feira ne’e rasik sei hala’o iha Ró laran, iha Portu Dili. Aleinde ne’e Feira livru ne’e sei partisipa husi Prezidente Repúblika José Ramos Horta, membru Governu balun inklui Embaixadór sira iha Timor-Leste.” Dehan Diretor Nasional Marketing Turizmu no Relasaun Internasionál, Edson Lopes
Diretor Nasional Marketing Turizmu hatutan, maski Ró refere to’o ona iha Portu Dili, maibé pasajeiru sira seidauk bele tun, tanba hein ekipa husi Diresaun Nasionál Transporte Marítima, imigrasaun, kuarentena nomos saúde, halo uluk inspesaun hafoin bele tun husi Ró refere.
“Vantajen husi vizita Ró ne’e rasik sei promove Timor-Leste ba mundu, ita hatene katak Timor-Leste nasaun barak mak seidauk koñese entaun liuhusi atividade sira hanesan ne’e hodi promove liután, tanba sira mai ne’e voluntáriu husi nasaun 35 ho totál ema hamutuk 100. Nune’e sei promove Timor-Leste nu’udar nasaun ne’ebé promove pás no estabilidade.” Hatutan Diretor Nasional Marketing Turizmu
Iha fatin hanesan Reprezentante husi Ró Doulos Hope, husi Nasaun Filipina, Mae Gabrillo hateten, hodi husu ba públiku atu vizita feira livru ne’e rasik tanba atividade feira ida-ne’e importante publiku liu-liu estudante sira iha Timor-Leste bele mai asesu ho lee referensia importante balun hodi bele hetan koñesimentu foun husi feira ne’e rasik.
“Aban ami sei loke ba públiku bele mai asesu feira ida-ne’e relasiona ho regra atu asesu iha feira ne’e hanesan ema ho tinan 18 mai kraik vizita la selu. Aleinde ne’e ema ho tinan 19 ba leten vizita sei seluk ho folin $0,20. Iha biblioteka, ami iha livru hamutuk rihun 2 ne’ebé ho tipu diferente no husu ba publiku liu-liu estudante sira bele mai asesu no lee hodi hetan referensia foun balun.” Dehan reprezentante Ró Doulos Hope, Mae Gabrillo
Reprezentante ne’e hatutan, iha feira ne’e sei la limite ba públiku, tanba kada loron iha oras ida simu ema 300. Hafoin oras ida remata sei sai hikas nune’e ema seluk bele asesu fila-fali, hodi bele halo rotasaun no ema seluk mos bele hetan oportunidade lee livru iha ro laran.
Esplika liután bainhira abertura ona feira sei loke ba públiku hahú tuku 13h00 to’o 17h00, maibé iha bainrua loke hahú tuku 10h00 no taka iha tuku 17h00. Aleinde ne’e Ró refere sei fila iha loron 29 Janeiru 2026.
Reportajen : Nelfiano
Foto : Nelfiano