Dili, 19 Janeiru 2026 (Média Democracia) – Komandu Imprensa Prezidente Repúblika Timor-Leste, Laureadu Nobel ba Pás, José Ramos-Horta, vizita privadu/traballu ba Davos, Suisa, husi loron 20 to’o 23 janeiru 2026, hodi partisipa iha Enkontru Anuál Fórum Ekonómiku Mundiál (WEF). Komunikadu ne’e asesu husi Pajina PR Segunda semana ne’e.
Prezidente Repúblika hateten, iha Komunikadu Fórum tinan ida-ne’e, ho tema “Espíritu Diálogu nian”, konvoka líder globál sira husi Governu, emprendedór no sosiedade sivíl hodi partilla dezafiu jeopolítiku, ekonómiku no ambientál sira ne’ebé urjente. Nune’e Timor-Leste nia kompromisu ba envolvimentu multilaterál ne’ebé konstrutivu no ninia papél proativu hodi fornese solusaun kolaborativa sira.
Iha loron 21 Janeiru iha diálogu estratéjiku nivel aas nian, inklui Enkontru Informál ida husi Líder Ekonómiku Mundiál sira (IGWEL) kona-ba “Restaura Espíritu Diálogu iha Mundu ne’ebé fahe malu” no Diálogu ho Parte Interesada sira ho títulu “Tau Empreendedór sira iha fatin ne’ebé Merkadu laiha.” President mós sei tuir sesaun ida ne’ebé organiza husi Global Citizen no Forbes.
Prezidente Republika hatutan, iha komunikadu durante vizita, kompromisu sira sei foka ba tema krítiku sira relasiona ho dame, kreximentu inkluzivu no rejenerasaun ambientál.
“Iha loron 22 Janeiru, sei hato’o diskursu prinsipál iha eventu paralelu importante rua. Primeiru, “Plástiku Neutrál Globál, Transforma Poluisaun ba Serbisu no Infraestrutura, sei ezamina hodi transforma krize poluisaun plástiku ba oportunidade ida ba empregu verde no infraestrutura sustentável. Segundu, Empregu Rejenerativu Millaun 100, Rekonstrui Ekonomia Lokál sira dezde Baze liuhusi Sistema Ai-han, Turizmu, no Asisténsia, sei destaka modelu rejenerativu sira hanesan dalan sira ba restaurasaun ekolojia no ekonomia komunitária sira ne’ebé reziliente.
Prezidente afirma, Iha mundu ida ne’ebé dalabarak nakfera tanba konflitu no deskonfiansa, ‘Espíritu Diálogu’ la’os de’it tema ida maibé nesesidade ida. Timor-Leste nia jornada rasik hanorin ita katak pás no prosperidade ne’ebé metin harii liuhusi konversa persistente no respeitoza no kompromisu kompartilhadu ho benkomún.
“Iha Davos, ha’u sei lori ita-nia povu nia lian, advokasia ba kooperasaun globál ne’ebé investe iha dame, fó kbiit ba empreendedór sira no proteje ita-nia planeta ba jerasaun sira iha futuru.” Dehan Prezidente Repúblika Timor-Leste, Laureadu Nobel ba Pás, José Ramos-Horta
Esplika liután Prezidente nia partisipasaun iha Fórum Ekonómiku Mundiál reafirma Timor-Leste nia papél ativu iha diálogu internasionál no ninia dedikasaun ba parseria hodi buka solusaun ba asuntu globál sira. Aleinde ne’e itineráriu Prezidente nian inklui mós série enkontru bilaterál ho figura xave internasionál sira no prezensa iha Jantar Sidadaun Global.
Reportajen : Nelfiano
Foto : Media PR