Dili 28 Janeiru 2026 (Media Democracia) – Polisia Nasional Timor Leste Munisípiu Dili Preparadu atu asegura Primeiru Ministru Australia, Anthony Albese durante halo vizita mai iha Timor-Leste iha loron 28 to’o 29 Fulan Janeiru tinan 2026.
“Kona-ba vizita primeiru ministru Australia nian mai iha Timor-Leste, Komado Munisípiu Dili hetan ona diretivas operasional husi Komando Jerál, no Komando Munisípiu Dili prepara ona nia planu espesifiku, liliu taktus sira ne’ebé atu implementa iha terrenu para asegura vizita ida ne’e, Mai no fila ho di’ak.” Dehan Komandante PNTL Munisípiu Dili, Superintendente Xefe, Orlando Gomes ba Jornalistq sira iha Komandu PNTL Munisípiu Dili, Dom Aleixo Tersa ne’e (27/01)
Komandante PNTL Munisípiu Dili dehan Komandu Munisípiu Dili koloka ona nia membru sira iha fatin ne’ebé determina tuir planu komandu Munisípiu Dili nian nune’e bele prepara an atu simu vizita Primeru Ministru Australia mai Timor-Leste
“Tanba ne’e ita koloka ona ita-nia membru sira, aban tuir planu ne’ebé Komandu Munisípiu Dili nian iha no sei hetan apoiu husi Unidade Polísia Espesiál, husi Unidade Polísia Marítima, husi UPF iha aeroportu nomós husi ita-nia forsa F-FDTL, para nune’é bele asegura ita nia vizita Primeiru Ministru Australia nian mai Timor-Leste la’o ho di’ak.” Haktuir Komandante PNTL Munisípiu Dili
Nia dehan tuir planu de seguransa aban loron 28 sei koloka membru sira iha terrenu atu nune’e halo seguransa ida ne’ebé di’ak atu nine’e publiku halo viajen ba mai ne’e, la’o ho di’ak no la’o ho susesu.
“Ha’u hanoin katak bain-bain ita hatene katak ita-nia dalan mak ne’e, ita nia estrada Aeroportu mai ba to’o iha ita-nia Palásiu Prezidente, ba Palásiu do Governu, ita-nia Rute mak ida ne’e, ne’ebé ita prontu atu asegura dalan sira nomós ita halo patrullamentu hodi haree kona-ba kestaun seguransa ne’ebé di’ak.” Orlando informa
Nia relata seguransa sira sei mantein hodi asegura iha dalan protokolu, ne’ebé tuir nia rute hahú husi Aeroportu Internasionál Nicolau Lobato ba iha Palásiu Prezidensiál no mantein ba to’o iha Palásiu Governu.
Komandante PNTL Munisípiu Dili, Superintendente Xefe, Orlando Gomes Esplika katak kona-ba atu blokeia estrada ne’e sei depende ba situasaun, tanba situasaun iha terrenu mak bele justifika katak dalan balun bele blokeia no iha dalan balun la blokeia, nune’e dalan sira bele la’o normal hanesan bain-bain.
Jornalista: Estefánia
Foto: Estefánia