Dili, 29 Janeiru 2026 (Média Democracia) – Komunikadu Imprensa Prezidente Repúblika no Laureadu Nobel ba Pás, José Ramos Horta, kondekora Grande Kolar Orden Timor-Leste nian ba Primeiru Ministru Austrália, Hon. Anthony Albanese MP iha Palásiu Prezidensiál Nicolau Lobato. Komunikadu refere asesu husi Pajina PR Kinta semana ne’e.
Prezidente Republika José Ramos Horta iha nia diskursu hatete, Onra loron ohin nian rekoñese la’os de’it ninia papél nu’udar Primeiru-Ministru, maibé mós valór sira ne’ebé nia reprezenta, fiar katak viziñu di’ak sira investe iha ida-idak nia susesu no parseria sira ne’ebé metin harii iha konfiansa, justisa, no vizaun ba tempu naruk.
“Primeiru Ministru Albanese nia lideransa reflete ona komprensaun ida ne’ebé klaru kona-ba ninia relasaun ida-ne’e. Nia envolvimentu ho Timor-Leste no prezensa iha momentu importante sira iha ita-nia viajen rejionál, hatudu respeitu jenuínu ba ita-nia rain no ita-nia povu. Tanba ne’e ho respeitu kle’an no agradesimentu sinseru mak ami kondekora ba ita-boot Orden Timor-Leste nian, Grande Kolar nu’udar rekoñesimentu ba solidariedade pasadu, parseria prezente no ita-nia kompromisu hamutuk ba futuru ida ne’ebé pasífiku no prósperu.” Dehan Prezidente da Republika José Ramos Horta
Iha fatin hanesan Primeiru Ministru Australia Anthony Albanese hatete iha diskursu katak, simu onra husi Timor-Leste hateten, “Ho haraik-an tebes simu onra ida-ne’e nu’udar indivídu nomos hanesan Primeiru Ministru Austrália nian.
“Ha’u agradese ba povu Timor-Leste. Ita fahe la’os de’it istória maibé mós futuru ida. Austrália hili atu sai imi-nia belun no viziñu, servisu hamutuk ho imi atu hadi’a, infraestrutura, edukasaun, seguransa no saúde, nune’e asegura rejiaun ne’ebé hakmatek, estavel, no reziliente. Ami sei kontinua fó apoiu ne’ebé ami bele, maibé ha’u fiar katak imi-nia povu no empreza sira sei hetan susesu. Espíritu imi- nia joven sira nian fó moris boot tebes buat ida ne’ebé ha’u sei nunka haluha. Espíritu ida ne’e mak sei garante imi-nia susesu.” Primeru Ministru Austrália Anthony Albanese hateten iha diskursu
Primeiru Ministru Austrália hatutan, Austrália sai nu’udar parseiru ida ne’ebé metin no konfiável iha dezenvolvimentu nasionál Timor-Leste nian, fó apoiu ba hametin instituisaun sira, dezenvolvimentu infraestrutura no kapasitasaun rekursu umanu sira. Nasaun rua ne’e iha parseria metin no dinámiku, ne’ebé suporta husi ligasaun entre povu ho dura, istória ida ne’ebé fahe no kompromisu ba rejiaun ida estável no prósperu.
“Relasaun bilaterál ne’e ampla no iha aspetu oioin no abranje envolvimentu polítiku ne’ebé metin, kooperasaun dezenvolvimentu ne’ebé substansiál no lasu ekonómiku sira hodi buras iha komérsiu no investimentu.” Hatutan Primeru Ministru Austrália
Primeru Ministru Austrália afirma, kooperasaun ne’ebé signifikativu habelar mós ba área defeza no seguransa inklui tuir akordu Koperasaun Defeza resíproka no area sosio-kulturál, notavelmente liuhusi mobilidade traballu, bolsa estudu edukasaun no apoiu ba Timor-Leste nia adezaun susesu ba ASEAN no OMK. Kolaborasaun ida-ne’ebé komprensivu ne’e reflete prinsípiu fundamentál katak forsa no prosperidade nasaun ida-idak nian nu’udar mós interese ba nasaun sira seluk.
Entertantu Grande Kolar Orden Timor-Leste mak nasaun nia onra aas liu, ne’ebé atribui ba Primeiru Ministru Austrália nian tuir Dekretu Prezidente Repúblika nian No. 03 /2026.
Esplika liután onra ne’e rekoñese katak durante nia kareira polítika tomak nu’udar joven polítiku, depois nu’udar líder opozisaun nian iha Parlamentu Federál, nomos nu’udar Primeiru Ministru Hon. Albanese hatudu ona kompromisu ida ne’ebé forte no metin hodi hakle’an liután lasu amizade no kooperasaun entre Austrália no Timor-Leste, viziñu sira ne’ebé ligadu ho jeografia no istória ida unidu iha parseria ida ne’ebé hateke ba oin.
Reportajen : Nelfiano
Foto : Media PR