Dili, 29 Janeiru 2026 (Média Democracia) – Relasiona ho kazu asaltu iha Tibar no iha Fahi-Ten, Komandu Munisípiu Liquiça halo ona kontaktu ho Komandu Unidade Espesiál Polísia (UEP) no ekipa seluk halo seguransa iha área ne’ebá.
Komandante Unidade Espesiál Polísia (UEP) Superintendente Polísia Damião da Silva Correia hateten, akontesimentu ne’ebé akontese iha área Tibar ba to’o iha Fahi-Ten, hetan ona kontaktu husi Komandate Munisipiu Liquiça, tanba ne’e dadaun ekipa seguransa halo ona monitorizasaun iha fatin refere.
“Ha’u hanoin kona-ba akontesimentu ne’ebé iha área tibar nian ba to’o iha fahi-ten ninian leten, hetan ona koordenasaun husi komandante Munisípiu Liquiça, no ohin dadersan hetan kontaktu. Entaun iha koordenasaun Ekipa Unidade Espesiál KAP Charli, haruka nia ekipa agora dadaun hamutuk ho sira monitorizasaun nafatin iha area refere.” Dehan Komandante Unidade Espesiál Polísia (UEP) Superintendente Polísia Damião da Silva Correia ba jornalista sira iha tasi-tolu Kuarta-feira (28/01/2026)
Komandante ne’e afirma ba pasajeirus no motorista sira bele halo ona movimentu, tanba dadaun ne’e PNTL koloka ona nia unidade iha área Tibar no Fahi-Ten nian.
“Motorista ba iha Bus no transporte, bele halo sirkulasaun la’o nafatin, tanba unidade agra dadaun koloka no apoiu ba iha Komandu Munisípiu Liquiça hamutuk ho ninia eskuadra nomos forsa rezerva Task Force husi Munisípiu Liquiça.” Afirma Komandante Unidade Espesiál Polísia (UEP) Superintendente Polísia Damião da Silva Correia
Komandante ne’e hatutan, dadaun ne’e Ekipa seguransa asegura hela fatin refere hodi garante estabilidade, liliu iha Tibar tantu ba to’o iha Fahi-Ten, nomos iha koordenasaun ho PNTL Munisípiu Ermera hodi koloka Task Force tun, no agora ne’e Unidade Apoiu hela ekipa Charly iha área refere.
Damião haktuir, agora dadaun seguransa sei foku apoiu ba vizita Primeiru Ministru Australia nian, maibé la husik mós haree ba probkema kiik iha rai laran.
“Agora dadaun ita hotu hatene sei apoiu seguransa ba ita-nia VIP, bainaka ne’ebé nasaun viziñu vizita mai ita-nia rain, agora dadaun sei fokus apoiu seguransa, maibé la husik mós ita-nia situasaun ki’ik sira ne’ebé akontese, unidade sempre iha koordenasaun apoiu ba iha Liquiça la’o nafatin.” Haktuir Komandante Unidade Espesiál Polísia (UEP)
Nia subliña, Komandante Munisípiu Liquiça informa ona ba komunidade sira iha área Tibar no Fahi-Ten atu identifika suspeitu sira ho nia orijen husi suku no aldeia ida ne’ebé, nune’e forsa bele kaptura ema hirak ne’e.
“Ohin komandante Munisípiu Liquiça kontaktu ona hodi fó hatene mós identifikasaun kona-ba suspeitu hirak ne’ebé iha sira-nia área, no iha Suku ka Aldeia ida ne’ebé, nune’e Forsa Espesial ba apoiu hodi halo kapturasaun.” Subliña Komandante Unidade Espesiál Polísia
Enkuantu, Pasajeiru Atsabe Bendito Gonçalves hateten, durante hahu husi segunda, Tersa, no kuarta Bus husi Dili ba Ermera to’o Tibar fila hotu, no postu polísia Tibar mós mamuk la iha seguransa ida.
“Ami haree katak agora laiha Autoridade ida ne’ebé bele foti desizaun hodi rezolve problema refere, tanba loron hira nia laran ne’e akontese bebeik no bus atu fila-fali ba atsabe, ohin dader iha bus 8 liu mak fila depois rua seluk ba liu Ermera ho Railaco hetan tuda.” Dehan pasajeiru Bendito
Hanesan pasajeirus sira la hatene kona-ba problema ne’ebé akontese entre grupu rua asaltu malu no la hatene kona-ba grupu A ka B mak ida ne’ebé. tanba ne’e nia parte husu ba Governu tenke foti desizaun lalais ba problema refere, tanba nu’udar povu presiza tebes estabilidade.
“Ami povu kiik ami la hatene buat ida, nune’e ami presiza tebes Governante sira tenke foti desizaun rigoroju bainhira problema ida akontese, tanba ami mós presiza estabilidade.” Hatutan pasajeiru Bendito
Reprezentante pasajeiru afirma, seguransa sira tenke tau atensaun ba iha foho sira ne’ebé aas, tanba dalabarak ema deskoñesidu sira hamrik iha leten hodi tuda bus ka kareta, motor privadu sira.
Reprezentante Komunidade Munisipiu Ermera Jorginha de Fatima husu ba seguransa sira atu asegura sira bainhira viajen husi Dili ba Ermera, tanba iha kuarta (28/01) sira husi Dili atu ba Ermera, maibé to’o iha Tibar ema deskoñesidu ida tuda, nune’e sira la konsege viajen ba Ermera hodi fila-fali mai Dili.
Reportajen : Estefania
Foto : Estefania