Dili, 04 Fevereiru 2026 (Média Democracia) – Inan Rosalina da Silva Perreira ho idade (49), mai husi Munisípiu Ainaro daudaun ne’e hela iha Munisípiu Dili Postu-Administrativu Dom-Aleixu Suku Manleuna, moris hanesan negosiante loron-loron sempre halo atividade negosiu ki’ik iha trotoar leten hodi responde ba nesesidade familia nian.
Negosiante Rosalina da Silva Perreira hateten, durante tinan barak nia laran moris hanesan ema negosiante hodi halo atividade negosiu ki’ik, nune’e bele hetan osan ituan sustenta ba nesesidade loron-loron nian inklui haruka mós oan sira ba iha nivel edukasaun.
“Ha’u hanesan ema negosiante loron-loron tenke ba hola modo husi merkadu Taibesi, nune’e bele lori mai fa’an tutan fali iha Manleuana. Modo ne’ebé kada loron ha’u ba kompras iha merkadu Taibesi sempre lori osan $30 lae $35 dolar, modo tahan ne’ebé ha’u hola hanesan mostarda mutin no metan, bayan, tomate liis no fehuk dikin, koto nurak repollu no seluk tan. Ha’u hanoin modo sira ne’ebé ha’u mensiona fasil tebes ema atu hola lalais.” Dehan Rosalina da Silva Perreira
Nia hatutan, modo ne’ebé kada loron ema hola to’o $30 lae $40 dolar maibé sei haree mós situasaun no kondisaun loron-loron nian, tanba iha ema barak mak fa’an modo ka halo negosiu ki’ik tuir dalan ninin barak tebes. Nune’e maske ema barak mak halo negosiu ki’ik iha dalan ninin maibé nafatin esforsu-an buka meus oioin hodi fa’an, nune’e bele hetan osan hodi sustenta ba nesesidade bazika nian no ajuda oan sira hodi asesu iha nivel edukasaun.
“Ha’u iha oan na’in rua mane ida no feto ida, daudaun ne’e oan mane iha kaben ona no oan feto sei hala’o hela prosesu estudu iha nivel universitariu no daudaun ne’e ha’u tenke buka osan liuhusi dalan oioin bele hetan osan, tanba ha’u nia kaben agora idade boot ona laiha forsa atu halo servisu hodi sustenta ba familia nia presiza no haree oan nia eskola.” Hatutan Rosalina da Silva Perreira
Nia afirma, maske buka osan sempre hetan dezafiu oioin maibé tanba nesesidade nia obriga tenke esforsu-an kria negosiu ki’ik ruma hodi hetan osan hodi responde ba nesesidade familia no haree oan nia eskola, bainhira tur de’it iha uma sei la hetan osan.
Esplika kle’an liután katak inan Rosalina sai hanesan xefe familia, tanba nia kaben ho idade ne’ebé boot no laiha forsa atu halo servisu hodi buka osan. Entaun nia tenke esforsu-an liuhusi maneira oioin hanesan kria negosiu ki’ik hodi fa’an modo, nune’e bele hetan osan hodi sustenta ba nesesidade uma laran nian inklui hodi apoiu mós oan ba prosesu estudu.
Reportajen : Nelfiano
Foto : Nelfiano