Dili, 07 Fevereiru 2026 (Média Democracia) – Polísia Nasionál Timor-Leste (PNTL) liuhusi Komandu Munisípiu Dili hetan mandadu husi tribunal bazeia ba Nuc 0487/25.DIBCR hodi kaptura suspeitu na’in rua ho inisiál JG iha Munisípiu Lautem no inisiál UF iha Ainaro.
Komandante Munisípiu Dili, Superintendente Xefe Polísia, Orlando Gomes hateten, mandadu kapturasaun ne’e relasiona ho akontesimentu iha loron 28 fulan dezembru 2025 kona-ba kazu Violasaun, koasaun seksuál no raptu ne’ebé akontese iha Postu-Administrativu Cristo Rei, Hali-Dolar, Hera.
“Ita kaptura ona suspeitu nain rua ligasaun ho kazu ne’ebé akontese iha loron 28 fulan dezembru 2025 kona-ba kazu violasaun, kazu koasaun seksual no raptu ne’ebé akontese iha momentu ne’ebá.” Dehan Komandante PNTL Munisípiu Dili Orlando Gomes iha nia kna’ar fatin Aimutin Sexta (06/02)
Komandante Munisípiu Dili hatutan, kona-ba kazu ne’e prosesa hela no komandu mós durante ne’e buka tuir hela suspeitu sira, no dadun ne’e mak foin hetan mandadu husi tribunal hodi halo kapturasaun ba suspeitu nain rua ne’e.
“Entaun ita ezekuta kedas mandadu husi tribunal, ita kaptura kedas suspeitu na’in rua, mandadu tribunal ne’e ba arguidu na’in haat maibé agora dadauk ne’e ita kaptura ona arguido na’in rua ne’ebé halai ses husi kapital Dili no agora dadauk ita lori ona mai iha komando seksaun investigasaun, nune’e ita bele enkamiña ba Tribunal.” Hatutan Komandante Munisípiu Dili
Komandante Munisípiu Dili afirma, PNTL sei nafatin buka tan arguido na’in rua ne’ebé ita observa hela, tempu badak ita sei kaptura hotu. Aleinde ne’e mós PNTL detekta arguidu sira-nia paradeiru iha Munisípiu ne’ebé sira iha ba, nune’e komandu halo koordenasaun ho komandu Munisípiu hodi kaptura.
“Ita detekta ona arguidu sira-nia paradeiru iha Munisípiu ne’ebá, entaun ita koordena kedas ho komandu Kunisípiu Lautem ho Munisípiu Ainaro hodi halo servisu iha terrenu, nune’e ita bele buka arguidu sira subar fatin.” Afirma Komandante PNTL Munisípiu Dili Orlando Gomes
Komandante PNTL reafirma, prosesu hotu la’o normal, tanba ne’e PNTL enkamiña ona ba Ministériu Públiku hodi ba tribunal, tanba ita hetan mandadu husi tribunal no ezekuta kedas hodi kaptura suspeitu na’in rua no sei falta tan suspeitu na’in rua.
Prosesu normal mak agora ita enkamiña ona ba Ministériu Públiku ba Tribunal, ita hetan ona mandadu tribunal, agora ita ezekuta mandadu tribunal ita hodi kaptura ona suspeitu na’in rua, sei falta rua. Tanba Vitima halo ona keisa depois mak ita halo prosesu, to’o ikus ita hasai mandadu para ita ezekuta mandadu tribunal.
Entretantu iha loron Kinta (05-02-2026) Seksaun Polísia Investigasaun Munisípiu Dili kaptura Suspeitu JG iha Lospalos Vila lori to’o mai iha Komandu Munisípiu Dili mais ou menus tuku 18.00 liu. No iha loron Sexta (06‐02-2026), Polísia Seksaun Investigasaun kontinua ba kaptura Suspeitu UF iha Ainaro no kontinua mai asegura iha komandu Munisípiu Dili iha oras 16.00 liu.
Suspeitu hirak ne’e lori kedas ba iha edifísiu Sub-Seksaun Polísia Unidade Vulnerabilidade (VPU) no kontinua ba detein iha sela Polísia. Enkuantu ekipa ne’ebé halo kaptura ba suspeitu na’in rua ne’e, lidera direita husi Xefe VPU Munisipiu Dili, Inspetór Xefe Anita Quadros.
Reportajen : Estefania
Foto : Estefania