Dili, 11 Fevereiru 2026 (Média Democracia) – Fundasaun Mahein hasoru malu ho Komandante Jerál hodi koalia kona-ba preokupasaun husi públiku iha prosesu rekrutamentu ba Vaga kandidatu PNTL 2025.
Diretór Ezekutivu Fundasaun Mahein Nelson Belo hateten, objetivu hasoru malu entre FM ho Komandante Jeral hodi kolia problema hirak ne’ebé agora daudauk akontese iha rekrutamaneut PNTL 2025.
“Ami hato’o ami-nia sujestaun ba Komandu, oinsá instituisaun ne’e hala’o nafatin nia kna’ar di’ak no lamentasaun sira ne’ebé husi públiku husu Ministériu Interiór atu bele responde no kria mekanismu oinsá para atu bele akomula lamentsaun sira ne’e. Nune’e bele kria nafatin konfiansa husi públiku ba institusaun PNTL.” Dehan Diretór Ezekutivu Fundasaun Mahein, Nelson Belo ba jornalista sira hafoin hasoru Komandante Jerál PNTL Komisáriu Jerál Polísia Henrique da Costa iha Kuartel Jerál PNTL Caicoli tersa ne’e (10/02)
Diretór Ezekutivu Fundasaun Mahein hatutan, Fundasaun Mahein la iha rekomendasaun ba vaga rekrutamentu PNTL nian tanba enkontru ne’e kortezia, nune’e sira la halo rekomendasaun ba Komandu Jerál, maibé opiniaun ne’ebé sira iha katak, rekrutamentu ne’e komisaun sira ne’ebé iha kontinua nafatin la’o ba.
Diretór Ezekutivu afirma, fatin ne’ebé públiku atu hetan preukupasaun ne’e mak Ministeriu Interiór tenke halo nia kna’ar, hodi halo esplikasaun oinsá mak alegasaun sira ne’e mosu no kompetensia Ministeriu Interiór para bele hatan. Maibé Fundasaun Mahein Prefere ba Governu atu kria komisaun independente ida hodi investiga klaru ba prosesu vaga rekrutamentu membru PNTL foun. Tanba dadaun ne’e públiku preokupa tebes ba prosesu rekrutamentu ne’ebé iha iregularidade, nune’e suspende lai prosesu ne’e.
“Atu identifika ho loloos no ho moos tenke kria komisaun independente ida hodi halo Investigasaun kle’an, nune’e bele hetan ninian verasidade, Suspensaun, hanesan horseik ami dehan tenke bazea Investigasaun no hanoin katak Governu bele kria komisaun independente ida para bele halo Investigasaun, rona alegasaun sira ne’ebé públiku rejista.” Afirma Diretór Ezekutivu Fundasaun Mahein
Diretór ne’e reafirma tan katak, komisaun ne’e tenke priense husi ema sé de’it, maibé ema ne’e profisionál no iha kredibilidade, nune’e atu rejista alegasaun husi públiku nian hodi fó solusaun husi aspeitu polítika no aspeitu legál.
Reportajen : Estefania
Foto : Estefania