Dili, 11 Fevereiru 2026 (Média Democracia) – Ministru Interior Francisco da Costa Guterres esklarese Konsellu Ministru deside suspende teste médiku ba kadetes foun PNTL sira ne’ebé mak pasa ona ba teste mediku bazeia ba reklamsaun sira hotu.
Depoizde reklamasaun oioin lori mai Konsellu Ministru deside katak, primeiru suspende tiha lai konkursu ne’e rasik, tanba presiza halo uluk verifikasaun no analiza hodi haree didi’ak fila-fali mak foin bele anúnsia rezultadu.
Ministru ne’e afirma, Konsellu Minstru fó ona mandatu ba Ministériu Interior atu restrutura fali komisaun verifikasaun hodi inklina fali GNR Portugal no Australia hodi halo revisaun ba rekrutamentu ne’e rasik.
“Segundu Konsellu Ministru mós fó mandatu ba ha’u atu restrutura fali komisaun verifikasaun no supervizasun, komisaun ida kompostu husi ema entidade oioin, horsida ita mós inklui ema internasional balun GNR husi Portugál no Austrália ho tan ema balun, nune’e fó servisu ba sira loron ruanulu para atu halo revizaun.” Dehan Ministru Francisco ba jornalista sira hafoin partisipa Reuniaun Konsellu Ministru iha Palásiu Governu, Kuarta (11/02)
Governante ne’e mós informa, fó tempu loron ruanulu atu halo revizaun ba rezultadu rekrutamentu kadetes PNTL tinan 2025
Ministru Francisco hatutan, atu halo revizaun ka teste fila ba 400 pessoas ne’ebé pasa ona ba teste mediku no 10.597 ne’e komisaun mak sei haree.
“Atu reteste ba 400 ka 10.597 ne’e ka oinsá ne’e komisaun mak sei haree. Kuandu iha iregularidade makas mak sei bele mós rekomenda ba ita atu repete fali ka resteste balun depende ba komisaun ne’e halo.
Reportajen : Estefania
Foto : Estefania