Dili, 11 Fevereiru 2026 (Média Democracia) – Ministra Saúde halo resposta ba informasaun ne’ebé fó sai husi komisaun rekrutamentu Vaga PNTL 2025 kona-ba stock ekipamentu reazente la iha hodi halo teste médiku ba Kadetez PNTL foun iha Laboratoriu Nasional HNGV.
Ministra Saúde Elia dos Reis Amaral hateten, relasiona ho informasaun kona-ba stock reajente iha Laboratoriu Nasional la iha atu halo teste médiku ba kandidatu kadetez PNTL foun ne’e lalos no konfirma ho Ministru Interior.
“Ha’u hanoin ita konfirma ho señor Ministru Interior mak hatene prosesu ida ne’e. maibé ha’u hatene katak informasaun ida dehan reazenta la iha ne’e lalos.” Dehan Ministra Saúde Élia hafoin remata reuniaun Konsellu Ministru iha Palásiu Governu kuarta (11/02)
Antes ne’e, iha segunda loron (09/02) Porta-vóz Komisaun Rekrutamentu ba vaga membru PNTL foun 2025 Superintendente Polísia, António da Luz hateten, tuir lolos prova médiku ba kandidatu membru PNTL na’in 400 ne’e hala’o iha tersa (10/2) to’o (20/2) maibé bainhira Depatamentu Saúde Komandu Jerál Polísia Nasionál Timor-Leste halo tiha koordenasaun ho parte Laborátoriu Nasionál sira dehan laiha ekipamentu ba teste, tanba ne’e komisaun deside halo adiamentu teste médiku ba kandidatu sira.
“Aproveita biban ida ne’e atu informa fali ba ita-bo’ot sira hanesan semana kotuk liubá fó sai ona ba públika katak iha dia 10 ita sei hala’o teste mediku ba kandidatu aptu 400 pessoa ne’e, maibé depoisde parte departamentu saúde halo koodenasaun ho Laboratóriu Nasionál Ospitál, Nasionál Guido Valadares ba konfirma katak ekipamentu ne’ebé halo teste reazente to’o agora seidauk iha.” Superintendente Polísia Antónia da Luz nia liafuan iha Sentru Formasaun Polísia (CFP) Comoro Segunda (09/02)
Aleinde ne’e, Xefe Departamentu Saúde Komandu Polísia Nasionál Analita do Rêgo mós hatutan, oráriu teste médika ka prova médika ba kandidatu sira ne’e tuir lolos halo iha loron 10 fulan Fevereiru to’o 20 fulan Fevreiru 2026, maibé ita seidauk bele halo teste tanba ekipamentu uza ba teste seidauk to’o husi rai liur.
“Maibé tuir konfirmasaun ne’ebé Departamentu Saúde halo ho Laborátoriu Nasionál katak fasilidade ne’ebé atu halo teste ba kandidatu sira ne’e seidauk to’o iha ne’e, tanba tenke hein husi rai li’ur, entaun ita tenke halo mudansa ba iha oráriu, nune’e ita hein de’it bainhira reazente to’o ami bele fó hatene data fiksu fali ba públiku.” Dehan Xefe Departamentu Saúde Komandu Polísia Nasionál Analita do Rêgo
Xefe Departamemtu ne’e informa tan, fasilidade ne’ebé uza atu halo teste ba kandidatu sira ne’e ho reazentes Complete Blood Count (CBC), Kimia ho reasent sira seluk. Nune’e husu publiku no kandidatu sira hein de’it.
Esplika liutàn katak, Ministra saude hateten kona-ba informasaun ne’ebé hato’o husi parte balun relasiona ho reazente ba teste kadetes foun la iha ne’e, informasaun lalos.
Reportajen : Estefania
Foto : Estefania