Dili, 12 Fevereiru 2026 (Média Democracia) – Core Grup Transferénsia Timor-Leste servisu hamutuk ho parseiru dezenvolvimentu sira iha Timor-Leste hodi kria aktividade formasaun prinsipal loron rua nian kona-ba politika Salvaguarda labarik sira. Formasaun refere hala’o iha salaun yayasan HAK Farol Dili.
Koordenador Core Grup Transferénsia Timor-Leste Jimicarter Moniz dos Reis hateten, atividade ba loron ohin nian sei koalia kona-ba politika salvaguarda labarik sira iha Timor-Leste hodi haree kona-ba labarik ne’ebé idade menor fa’an sasan iha dalan ninin.
“Ita hotu hatene politika salvaguarda labarik nian importante tebes ba Organizasaun sira liu-liu sosiadade sivil oinsa bele tau iha sira-nia organizasaun, nune’e bele ba implementa atividade iha Munisípiu hotu hodi fahé formasaun ba komunidade sira oinsa bele tau importansia ba labarik sira-nia diretu, tanba labarik mak importante tebes ba nasaun ida-ne’e no sai hanesan jerasaun foun ba futuru.” Dehan Koordenador Core Grup Transferénsia Timor-Leste Jimicarter Moniz dos Reis
Koordenador Core Grup hatutan, tanba ne’e presiza tau importansia ba labarik sira, nune’e koalia kona-ba direitu labarik nian, tanba iha konstituisaun Republika Demokratika Timor-Leste kolia ona, katak labarik sira presiza tau protesaun husi familia, Estadu nomos inan-aman rasik
“Ha’u hanoin katak liuhusi treinamentu ida-ne’e iha informasaun sira kona-ba boa seguransa labarik. Nune’e formasaun refere sai hanesan fator importante tebes ba membru sosiadade sivil liu-liu Core Grup Transferénsia Timor-Leste, hodi bele uza materia sira ne’ebé ohin sira hetan ba fahe fali iha Munisípiu, hodi bele asegura labarik sira iha baze.” Hatutan Koordenador Core Grup Transferénsia Timor-Leste
Koordenador informa, liuhusi formasaun ne’e bele hasa’e ona membru sira-nia koñesimentu no kapasidade oinsa bele utiliza manual politika salvaguarda labarik sira, tanba ne’e treinamentu refere importante tebes ba sosiedade sivíl, tantu Governu uza sai hanesan padraun ida, hodi bele gia no lao tuir formatu ne’ebé estabelese ona.
“Ita haree iha konvensaun diretu labarik nian iha prinsípiu tolu hanesan, 1. laiha deskriminasaun ba labarik sira, 2. labarik sira tenke partisipa iha atividade hotu-hotu, no 3. labarik sira presiza moris iha identidade ne’ebé loos, tanba ita haree katak importante tebes ba Estadu no rai ida-ne’e.” Infroma Koordenador Core Grup Transferénsia Timor-Leste
Koordenador afirma, iha formasaun ne’e iha materia importante sira hanesan, saida mak definisaun labarik, politika salvaguarda labarik ninian, kona-ba risku halo mitigasaun ba labarik sira iha baze.
Esplika liután atividade loron ohin nian realiza husi Core Grup Transferénsia Timor-Leste hamutuk ho membru 16, hetan mós partisipasaun husi Organizasaun lokal hanesan Raies Hadomi Timor Oan (RHTO) no Radiu Komunidade Difisiensia Timor-Leste (RKDTL). Aleinde ne’e formasaun refere sei hala’o loron rua. Loron dahuluk kona-ba salvaguarda labarik, loron daruak kona-ba politika salvaguarda labarik nian iha Timor-Leste.
Reportajen : Nelfiano
Foto : Nelfiano