Dili, 13 Fevereiru 2026 (Média Democracia) – Bazeia ba informasaun husi públiku ne’ebé sempre kestiona ba estasionamentu iha areadores Palasiu Governu ne’ebé hamosu engarrafamentu no okupa trotoar, tanba ne’e Diresaun Tránzitu Rodoviáriu Nasionál (DTRN) hala’o observasaun direta ba sinais ne’ebé antes ne’e Diresaun Nacional Transportes Terrestres monta ona hodi hasai fila-fali.
Xefe Departamentu Koordenasaun Jestaun Risku no Formasaun Edukasaun Sivika, Domingos Sarmento Gama hateten, públiku kestiona kona-ba estasionamentu iha areadores Palasiu Governu, tanba ne’e ohin halo observasaun no haree direta estasionamentu ne’e la fó fatin ba ema atu halo movimentu.
“Ita-nia lei kodigu estrada artigu 49 to’o 50 koalia kona-ba estasionamentu, regra estasionamentu ne’e iha lei klaru. Estasionamentu presisamente motorista sira iha konsiensia oinsa mak estasionamentu ne’e labele afetadu ba movimentu sidadaun sira, ezemplu troto leten, entaun sira halo estasionamentu fó espasiu ba ema lao ain sira bele halo sirkulasaun.” Dehan Xefe Departamentu Koordenasaun Jestaun Risku Domingos Sarmento Gama, ba jornalista sira iha areadores PG kinta (12/02)
Xefe Departamentu Koordenasaun Jestaun Risku hatutan, dadaun ne’e estasionamentu ne’e la fó fatin ba ema lao ain sira, tanba ne’e hamosu públiku nia preokupasaun hodi kestiona iha média sosial kona-ba motorizada para arbiru iha Palásiu Governu.
Xefe ne’e relata tan, parte Komadu mós iha orientasaun ba Diresaun Tránzitu Rodoviáriu Nasionál (DTRN) tanba ne’e tenke tun observa direta areadores Palasiu Governu depois rekomenda fila-fali ba DNTT, nune’e hodi haree ba futuru sei presiza atu halo saída.
Domingos informa, iha tinan kotuk área Palasiu Governu ne’e parte DNTT koloka ona Sinais de Estasionamentu, tau sinais no signifika providu atu para kareta no motor iha área ne’e.
“Ita lahatene DNTT ne’ebé antes tau sinais hasai fila-fali sira koordena ho Palasiu Governu mak hasai fila-fali sinais ne’e kalae, tanba antes sira hasai sinais la koordena ho ami.” Relata Domingos Sarmento Gama
Depois observa, parte DTRN rekomenda fila-fali ba DNTT karik bele tempu badak koloka fali sinais proividu estasionamentu iha área ida ne’e ho razaun tanba areadores ida ne’e Palasiu Governu, se estasionamentu mak runguranga hanesan ne’e vijintante VIP sira tama haree ladun furak no hatudu imajem la di’ak ba públiku.
“Rekomanda ba DNTT tempu badak koloka fila-fali sinais refere, maibé ida ne’e ami sei halo relatoriu ba parte kompotente sira para oinsa bele koordena hamutuk hodi koloka fila-fali sinais providu estasionamentu.” Informa Xefe Departamentu Koordenasaun Jestaun Risku
Nia haktuir, dadaun ne’e parte Diresaun Tránzitu Rodaviária Nasionál observa tuir lei kódigu estrada artigu 49 to’o 50.
“Agora ita observa direta haree viola lei kodigu estrada artigu 49 to’o 50 kona-ba estasionamentu ne’ebe ohin ita mai observa. Ita fo avizu de’it tanba sinais refere ita hasai tiha ona.” Afirma Domingos Sarmento Gama
Domingos Sarmento Gama salenta, ida ne’e prokupa tebes oinsa tempu tuir mai bele koloka fila fali estasionamentu liu-liu iha areadores Palasiu Governu.
Funsionariu Palasiu Governu ne’e atu para motor ka kareta iha ne’ebe de’it, responsavel sira-nia laos signifika nia servisu iha Palasiu Governu nia tenke para motor ka kareta iha area Palasiu Governu nian, lolos labele.” Salienta Domingos
Diresaun Tranzitu Rodaviária Nasional tenka koordena ho DNTT hodi tau ideia hamutuk nune’e iha futuru bele monta fila-fali sinais refere, nune’e kareta ka motor labele para arbiru iha Palasio Governu.
Reportajen : Estefania
Foto : Estefania