Dili, 13 Fevereiru 2026 (Média Democracia) – Prezidente Komisaun B ne’ebé trata ba asuntu Negósiu Estrajeiru Defeza no Seguransa Domingos Agosto “Deker” hateten, Komisaun B nia prezensa iha Komandu Jerál PNTL hakarak manifesta hodi rekomenda ba iha Komandu PNTL tenke evita familiarismu, favoritismu hodi garante transparánsia ba sidadaun hotu-hotu.
Deker hateten, momentu rekrutamentu la’o komisaun B hola parte iha rekrutamentu ne’e nu’udar supervisaun ida, maski hatene katak rekrutamentu ne’e iha iregularidade maibé labele halo intervensaun iha momentu ne’ebá, nune’e Komisaun B halo rekomendasaun ba komisaun rekrutamentu tanba kaer ba prinsipiu separasaun poder.
“Ita-boot sira komprende separasaun poder ka lae, Deputadu ida asumi responsabilidade ida halo supervizasun labele ba tau kanuru tohar tama iha laran fali komprende ka lae! Públiku presiza hatene sasán sira ne’e. La’ós (campur aduk). Respeita no hakruk ba separasaun poder, nune’e Komisaun B no parte seluk halo de’it supervizasun ho akompañamentu, no desizaun ne’e kompete ba komisaun rekrutamentu.” Dehan Prezidente Komisaun B ba jornalista sira hafoin enkontru ho Komandante Jerál PNTL Komisáriu Jerál Polísia Henrique da Costa no Prezidente Komisaun Rekerimentu membru PNTL foun 2025 Komisáriu Pedro Belo iha Komandu Jerál PNTL Caicoli Sesta ne’e (13/02).
Deker informa, komisaun B deteta iha iregularidade iha rekrutamentu kandidatu vaga membru PNTL foun.
“Ein prinsipiu Komisaun B nia pozisaun rekoñese katak iregularidades ne’e iha, maibé bazea ba nesesidade Komandu PNTL ninian liliu preukupasaun kona-ba menus rekursu umanu iha instituisaun ida ne’e.” Informa Prezidente Komisaun B ne’ebé trata ba asuntu Negósiu Estrajeiru Defeza no Seguransa Domingos Agosto “Deker”
Prezidente Komisaun B ne’e afirma katak, Komisaun B nian pozisaun antes kedas katak ita anula para depois ita lakon tempu tan, entaun di’ak liu ita suspende nune’e parte hotu-hotu ita kontribui ba hadia iregularidade sira ka faillansu sira ne’ebé iha ka kontnua nafatin prosesu ne’e para depois bele hetan rekrutamentu ba ita-nia membru sira.
Prezidenti ne’e reafirma, dadaun ne’e Komisaun B halo fiskalizasaun daruak, ohin iha Komandu Jerál, no sei ba Komisaun Rekrutamentu nune’e bele hatene iha iregularidade ne’e iha ne’ebé.
“Komisaun B nian kestaun asumi nian responsabilidade mak tenke halo fiskalizaun, depois husi fiskalizaun ne’e mak identifika buat ruma, ami sei hato’o liuhusi ami-nia relatóriu.” Reafirma Prezidente Komisaun B ne’ebé trata ba asuntu Negósiu Estrajeiru Defeza no Seguransa
Domingos salienta, Komisaun B halo ona fiskalizasaun ba daruak ne’e ladauk ko’alia buat ruma, tanba iha asuntu defeza no seguransa sensetivu, iha buat balun ne’ebé bele ko’alia ba públiku no buat balun ne’ebé barak labele ko’alia ba públiku.
“Kuandu iha iregularidade ne’e ami tenke kontribui liuhusi ami nia rekomenda ba Komandu PNTL liuliu ba Komisaun Rekrutamentu ba Ministeriu Interiór tau konsiderasaun, tanba iha ami-nia posizaun sidadaun hotu-hotu iha direitu atu hetan asesu ba rekrutamentu ne’e.” Salienta Domingos Agosto “Deker”
Nia mós akresenta tan, Komisaun B seidauk bele ko’alia buat ruma kona-ba informasaun, katak iha Deputadu balun rekomenda oan sira iha rekrutamentu ne’e media nia interpresaun de’it.
“Tanba iha informasaun ne’ebé media fó sai iha los balun no balun la’ós, hanesan reprezentante povu hakruk no respeitu nafatin prinsipiu separasaun poder, hanesan orgaun polítiku hala’o ami nia fiskalizaun para kontribui liuhusi ami-nia relatóriu. Komisaun B seidauk realsa buat ruma ne’ebé públika iha media, ami seidauk konsidera ne’e faktus, enkuantu ami seidauk kaer evidensia iha liman.” Relata Prezidente Komisaun B ne’ebé trata ba asuntu Negósiu Estrajeiru Defeza no Seguransa Domingos Agosto “Deker”
Iha fatin hanesan Komandu Jerál PNTL Komisáriu Jerál Polísia Henrique da Costa hateten, ohin Komisaun B rekomenda ba Komandu PNTL buat ne’ebé prinsipál mak tau atensaun hodi halo prosesu ho transparansia. Tanba rekrutamentu ida ne’e ema preukupa mak familiarismu hodi nune’e tau iha prátika hodi hahú prosesu ida ne’ebé justu. Ita iha loron ruanulu hodi serbisu hamutuk haree kona-ba problema refere.
Komandante jerál PNTL Komisáriu Jerál Polísia garante katak prosesu sira ne’ebé mai ne’e sei la’o ho trasnparánsia.
“Ida ne’e mak ema hotu-hotu hakarak la’ós dehan Komandu mesak, implementasaun prosesu ida ne’ebé trasnparánsia nakloke ba ema hotu, nune’e ema hotu-hotu iha oportunidade ne’ebé hanesan.” Afirma Komandu Jerál PNTL Komisáriu Jerál Polísia Henrique da Costa
Rekrutamentu ne’e ba Timor-oan hotu, la’ós ba de’it António nia ka oan José nia oan no família, ida lae, maibé Timor-oan hotu bele partisipa iha prosesu refere no bele kompete.
Henrique esplika kle’an liután katak, Ministeiru ne’ebé iha kompetensia atu nomea ema tur iha Komisaun rekrutamentu maka Ministru Interiór, no laos Komandu Jeral.
Reportajen : Estefania
Foto : Estefania