Dili, 17 Fevereiru 2026 (Média Democracia) – Diresaun Tranzitu Seguransa Rodaviária Nasional (DTSRN) ho Diresaun Nasional Transporte Terrestre sei foti medidas ba Motor Eletriku (Scuter) sira ne’ebé hamosu preokupasaun tanba movimentu iha dalan públiku dala barak liu labarik ka idade minoridade mak sae no dalaruma mós tula ema rua ka tolu no la kumpre ba Kóndigu Lei Estrada númeru 6/2003 liuliu la uza kapasete no la respeita sinál tránzitu.
Xefe Departamentu Koodenasaun Jestau Risku, Formasaun Edukasaun Sivika husi Diresaun Nasionál Tránzitu Segurnasa Rodaviaria Superintendente Asistete Polísia Domingos Gama, hateten, DNTS no DNTT asina ona nota kooperasaun hodi halo kontrolu ba movimentasaun motór eletriku (Scuter).
“Bazeia ba preokupasaun sira ne’e mak foin lalais iha semana rua ka tolu ba kotuk parte Diresaun Tránzitu Seguransa Rodaviária ka Diresaun Nasional Transporte Terrestre enkontru konjutu ida atu oinsá foti medidas ba motor ki’ik sira, tanba motor scooter ne’e ita la konsidera hanesan bisikleta maibé ida ne’e konsidera iha kódigu estrada númeru 6/2003 iha artigu 101 ko’alia kona-ba motor síkulu kategoria roda rua no roda tolu.” Dehan Superintenden Asistente Polísia Domingos gama ba jornalista sira iha Komandu Jerál PNTL segunda ne’e (16/02)
Superintenden Asistente Polísia ne’e hatutan, iha lei kódigi estrada ne’e ko’alia mós kona-ba transporte ho rodan2 ba leten ne’ebé motor Eletriku (Scuter) mós konsidera tama iha kategoria motorizada kiik sira.
“Entaun iha ne’e lei kódigu estrada ne’e mós ko’alia se nia tama kategoria siklu motor, entaun sidadaun sira ne’ebé atu utiliza motor scuter ne’e tenke iha dokumentus no tenkeser iha karta kondusaun para oinsá sira-nia movimentu involve iha asidente ruma ka envolve iha sinais ka kontra ordenatorius ruma ita bele hola medidas tuir kódigu estrada.” Hatutan Superintenden Asistente Polísia
Superintenden afirma, iha lei kódigu estrada 120 koa’lia kona-ba sidadaun ne’ebé iha direitu atu hetan karta kondusaun ne’e ho idade 16 to’o 18 bazeia ba kategoria karta komdusaun nian.
“Ita-boot sira hatene katak atu hetan karta kondusaun kategoria A1 ne’e 16 anos ba leten se A, B, C ka kategoria E tenkeser 18 ba leten.” Afirma Superintenden Asistente Polísia
Nia informa, motor eletriku sira dadaun ne’e kuaze barak iha kapital Dili no tuir observasaun DTSRN nian katak maioria labarik minoridade ho idade 10 ka 11 anus mak komesa domina ho motor eletriku (Scuter). Tanba ne’e, Diresaun Tránzitu Seguransa Rodaviária servisu hamutuk ho Diresaun Nasional Transporte Terrestre hola medidas bazeia ba artigu 101.
“Motor scuiter ne’e nia velosidade kuaze hanesan ho motor ki’ik sira, kuandu envolve asidente ruma soke ema, ema bele mate. Entaun razaun ida ne’e mak ita diskuti hamutuk ona iha seman 2 ba kotuk, iha mós abaixo asinadu entre Diretór nain rua, Diretór Tránzitu Diresaun Seguransa Rodaviária ho Diretora Diresaun Nasional Transporte Terrestre, nune’e ita bele avizu ona ba públiku.” Informa Superintenden Asistente Polísia
Iha biban ne’e mós Xefe Departamentu Koordenasaun Jestaun Risku, Formasaun Edukasaun Sívika husi Diresaun Tránzitu Seguransa Rodaviária Nasional apela ba públiku no ba inan-aman sira sosa motor eletriku ba oan sira ho idade 16 ba leten no tenke iha dokumentus.
“Aproveita tempu ida ne’e hakarak avizu ba públiku hotu, liuliu ba inan aman sira ne’ebé hola motor scuiter ne’e, karik atu sosa ba oan sira ne’ebé ho idade adultu mais ou menus 16 ba leten mak foin bele utiliza, wainhira hola motor scuiter ne’e tenke trata sira-nia dokumentus, motor sira ne’e tenke rejistu para ita kontrola, no rejistu iha Diresaun Nasional Transporte Terrestre, nune’e fasil kontrola.” Reafirma Xefe Departamentu Koodenasaun Jestau Risku, Formasaun Edukasaun Sivika husi Diresaun Nasionál Tránzitu Segurnasa Rodaviaria Superintendente Asistete Polísia Domingos Gama
Nia parte husu mós ba joven sira ho idade menor sira, atu inan aman sira labele autoriza uza motor eletriki (Scuter) tanba ba oin parte DTSRN ho DNTT sei halo operasaun ba motor eletriku iha kapital Dili.
Enkuantu detekta labarik ho minoridade sira uza hela motor scuiter, PNTL sei kaer no bolu inan aman sira mai halo deklarasaun, hodi kumpri lei kódigu Estrada. Aleinde ne’e mós PNTL sei pasa revista kona-ba dokumentus sira, nune’e karik dokumentu la iha signifika motor refere ilegal no PNTL sei prenda motor scuiter refere.
Reportajen : Estefania
Foto : Estefania