Dili, 17 Fevereiru 2026 (Média Democracia) – Komunidade Xineza iha Timor-Leste halibur malu iha Xina Maromak nia fatin hodi halo (Sangbaia) kulturál atu marka selebrasaun tinan foun Xineza nian. Depois husi ritual (Sangbaia) ne’e, lideransa komunidade sira ba hato’o komprimentu ba Embaixadór China iha Timor-Leste.
Tuir Prezidente Asosiasaõ Comercial Chinesa de Timor Oeste (Sigla Portugues ACCCTO) Katleen Gonçalves hateten, komunidade Xineza konta ho ema hamutuk rihun 20 iha Timor-Leste, no hamutuk ho komunidade Xineza sira iha mundu ne’ebé to’o millaun 20 resin, selebra festa pasajen Tinan Foun Xineza ho alegria Festival Primavera nian.
“Ita hotu hatene katak komunidade Xineza hamutuk iha selebrasaun anu novu Xineza nian, lori alegria Festival Primavera mai iha ita-nia rai laran, nomos halo koperasaun ekonómika, komersiál no kulturál.” Dehan Prezidente ACCCTO, Katleen Gonçalves iha Xina Maromak
Prezidente ACCCTO hatutan, iha Timor-Leste komunidade Xineza konsidera loron ne’e hanesan loron espesiál tebes, maibé to’o agora seida’uk sai feriadu públiku ofisiál ba komunidade Xineza, maski iha Timor-Leste komunidade relijiozu sira hanesan komunidade Islamiku hetan ona loron rua feriadu públiku.
Iha parte seluk Vise-Primeiru-Ministru Francisco Kalbuadi Lay mós marka prezensa iha selebrasaun ne’e. Nia hato’o boas festa ba Embaixadór no komunidade Xineza sira ne’ebé hamutuk iha fatin ne’e atu selebra sira-nia loron bo’ot.
“Ha’u husu ba Nai Maromak atu tulun ita hotu-hotu. Amu Pope Francis mos fó hela lia-fuan kona-ba fraternidade umana, katak iha loron saida de’it ita bele festeza hamutuk nu’udar ema ida de’it. Nune’e ohin ha’u mai iha fatin ne’e atu hato’o boas festa ba Embaixadór ho ekipa no komunidade Xineza iha Timor-Leste.” Dehan Vise-Primeiru Ministru
Vise-Primeiru Ministru hatutan, selebrasaun Tinan Foun Xineza iha Timor-Leste ne’e hatudu toleránsia relijioza, diversidade kulturál no relasaun amizade ne’ebé metin entre povu Timor-Leste no povu Xina.
Iha fatin hanesan Embaixadóra Xineza mai Timor-Leste, Wahng Wenli hateten, selebrasaun tinan foun xina nian, sira hakarak dedika oinsa hametin koperasaun Xina ho Timor-Leste ba iha futuru.
“Lori komunidade Xineza iha Timor-Leste hato’o haksolok iha tinan foun Xina nian, espera selebrasaun tinan foun ida ne’e komunidade xina iha Timor-Leste bele moris iha paz estabilidade nia laran hodi kontribui ba prosesu dezenvolvimentu iha Timor-Leste.” Dehan Embaixadóra Xineza mai Timor-Leste, Wahng Wenli
Embaixadóra Xineza mai Timor-Leste mós husu sidadaun Xineza iha Timor-Leste hodi hametin kultura ho identidade no promove paz iha Timor-Leste.
Reportajen : estajiadu Marito
Foto : Marito