Dili, 13 Novembru 2024 (Média Democracia) – Martinho Saheliba ho idadae (79) husi Munisípiu Viqueque Postu-Administrativu Ossu, kada semana ida tenke tun mai Dili hodi halo atividade negósiu hanesan fa’an bua, malus, ahu no tabaku tuir estrada ninin nune’e hodi responde ba nesesidade familia nian.
Tuir Martinho Saheliba hateten, durante tinan barak nia laran moris hanesan ema negosiante hodi halo atividade negosiu ki’ik hanesan fa’an bua, malus, ahu no tabaku, nune’e bele hetan osan ituan hodi sustenta ba nesesidade loron-loron nian no haruka bei-oan sira ba iha nivel universidade
“Maske ho idade ne’ebé boot ona maibé ha’u hakarak halo negósiu, tanba liuhusi negósiu lao ain ajuda ona ha’u, nune’e labele hatan moras arbiru tanba baihira ha’u tur de’it iha uma ha’u sente atu moras fali tanba la halo servisu ruma, nune’e ha’u deside kada semana husi ossu tenke tun ba Dili hodi halo negósiu ki’ik ruma, nune’e bele hetan osan ituan hodi sustenda ba ha’u nia presiza no haree beioan sira nia eskola.” Dehan Martihno Saheliba
Nia hatutan tan katak bua, malus, ahu no tabaku ne’ebé kada loron ema hola too $5.00 lae $10 dolar maibé haree mós sorte ema ida-idak nian, tanba iha ema barak mak fa’an bua, malus, ahu no tabaku, iha merkadu tuir dalan ninin no fatin seluk.
“Ha’u mai Dili hela ho alin sira iha Manleuana hodi halo negósiu, nune’e dadersan tuku lima (5.00) ha’u sempre hader sedu hodi prepara sasan sira nune’e komesa lao-ain hodi fa’an. Tanba iha dadersan iha ema barak mak buka bua no malus atu sosa, nune’e ha’u lao husi Manleuana ba too Tasi-tolu no meudia ha’u tenke fila ba uma han meudia. Han hotu deskansa tia ituan depois tuku rua kontinua lori sasan ba fa’an iha delta ba too fatuhada lao tama bairo laran, nune’e fasil ba ema sosa lalais sasan maibé lorokarik tuku neen ha’u tenke fila ona ba uma.” Dehan nia
Nia salienta liután katak bua maran ne’ebé hola tutan fali husi ema seluk kada batan ida ema fa’an $15 dolar nune’e lori mai fa’an fali iha Dili kada kesak ida fa’an ba $0.50. Ahu ema fa’an ba plastik ida $0.25, lori mai fa’a iha Dili plastik ida $0.50. tabaku hola husi ema plastik ida $0,50 lori mai fa’an tutan fila fali plastik ida $1.00 dolar. Malus ema fa’an futun ida $0.50 lori mai fa’an tutan fila fali futun ida $1.00 dolar. nune’e fasil ba ema atu hola-hotu lalais tanba kada loron rua ka tolu tenke fila ba ossu hodi hola nafatin sasan lori mai fa’an iha Dili
“Durante halo atividade negósiu maske hetan osan ho rendimentu ne’ebé ki’ik maibé ida ne’e la sai problema mai ha’u, naran katak kada loron tenke hetan netik osan oituan hodi sustenta ba presiza loron-loron nian.” Nia hatutan
Esplika kle’an liután katak avo Martinho maske ho idade ne’ebé boot maibé nafatin esforsu-aan hodi halo negósiu tuir dalan ninin. Atividade negósiu ne’ebé nia halo la sente kolen no baruk maibé nafatin iha esperansa hodi esforsu no luta ba presiza loron-loron nian.
Reportajen : Nelfiano
Foto : Nelfiano