Dili, 24 Fevereiru 2026 (Média Democracia) – Prezidente Autoridade Protesaun Civil (APC), Jusuino D.R.M Carvalho dehan daudaun ne’e atu atualiza informasaun relasiona ho indunsaun horikalan nian ne’ebé akontese udan boot kuaze oras tolu ka haat nia laran afeita ba komunidade sira iha Postu Veracruz Suku Kaikoli nomos Hera.
“Ami hakarak hato’o ba komunidade katak inundasaun hanesan ne’e komunidade sira tenke koordena ho Autoridade lokal nune’e bele fó informasaun mai ami, nomos pontu fokal sira ne’ebé destakadu iha nivel Munisípiu, Postu nomos Suku sira nune’e apoiu lalais problema ne’ebé akontese.” Dehan Prezidente Autoridade protesaun Civil (APC), Jusuino D.R.M Carvalho
Prezidente APC hatutan, situasaun hodi-bairua kalan akontese udan boot afeita ba komunidade sira iha parte Kaikoli nian hamutuk ema nain 110 inklui labarik kiik hamutuk 36 no bebe 1 iha Xefe familia hamutuk 26. Nune’e komunidade 110 ne’e evakua kedas mai edifisiu APC Kaikoli tanba kondisaun uma nakonu bee.
Vitima sira ne’ebé evakua mai edifisiu APC Kaikoli barak liu mai husi Veracruz ekipa konsege ba to’o iha Hera iha inpaktu ida tanba moru kompania Heineken ninian satan bee tama hotu ba komunidade nia uma iha kalan boot, no sira rasik rezolve kondisaun hodi ses husi inundasaun.
“Husu ba parte kompetente no Autoridade lokal sira bele informa ba nain kompania buka oinsa bele normaliza moru refere, nune’e labele fó amiasa ba komunidade sira bainhira akontese undan boot.” Hatutan Prezidente Autoridade protesaun Civil (APC)
Nia afirma, mensajen ba komunidade tomak iha teritoriu katak bainhira akontese udan boot husu atu hakmatek iha fatin labele halo movimentu ba mai, nune’e labele fó perturbasaun ba APC nia movimentu bainhira atu ba apoiu komunidade ne’ebé afeita ba inundasaun.
Iha fatin hanesan Xefe Suku Kaikoli Hipolito Margues Sarmento hateten, inundasaun hodi-bairu kalan kuaze oras tolu haat nia laran liu fali 04 Abril tinan kotuk nian, tanba kada tinan sempre akontese inundasaun, maibé tinan ida ne’e sede Suku mós bee sa’e, ne’e komunidade sira mais grave tanba ne’e udan boot tebes.
“Ha’u sente inundasun ida hodi-bairua kalan boot liu fali 04 Abril tinan kotuk nian tanba sede Suku mós bee sa’e, entau ha’u nia komunidade sira ita labele konta tan ona, tanba ne’e bee ho korente boot sira tenke afeita maka’as. Horikalan ha’u labele lao ba haree direita komunidade sira, tanba bee boot nune’e simu de’it informasaun husi parte relevante katak komunidade barak mak afeita ba inundasaun, kompostu husi aldeia lima xefe familia hamutuk 996 no populasaun hamutuk 5338, nune’e 80% afeita ba inundasaun no 20% la afeita ba inundasaun.” Dehan Xefe Suku Kaikoli Hipolito Margues Sarmento
Xefe Suku hatutan, komunidade Kaikoli ne’ebé evakua ba edifisiu APC husi Aldeia lima ne’e, Aldeia tolu la afeita ba inundasaun iha Aldeia rua mak afeita ba inundasaun hanesan Aldeia 05 Tahu-laran no Aldeia 4 Fohorai-boot mak afeita ba inundasaun.
Reprezentante komunidade afeita ba inundasaun, Fernanda Martins hateten, udan boot ne’ebé akontese durante oras tolu ka haat nia laran hamosu inundasaun ba komunidade hotu.
“Udan boot hodi-bairua kalan kuaze oras tolu ka haat nia laran volume bee ne’ebé as tebes nune’e ha’u rasik afeita ba inundasaun ate agora bee sei nakonu iha ha’u nia uma laran, nune’e ohin ha’u mai husu tulun husi APC liuhusi Bombeiros atu bele ba supa tiha bee ne’ebé nalihun hela iha laran.” Dehan komunidade afetadu, Fernanda Martins ba Jornalista sira iha Edifisiu APC Kaikoli Segunda feira semana ne’e
Komunidade ne’e hatutan, bee ne’ebé nalihun hela iha uma laran estragus hotu sasan uma laran nian hanesan televisaun, jaleira, kulisaun, livru nomos dokumentus sira seluk, nune’e iha biban ne’e mai husu ba parte Bombeiros bele ajuda supa tiha bee ne’ebé nalihun hela iha uma laran.
Esplika liután, relasiona ho inundasaun ne’ebé akontese husu ba Governu liuhusi Ministeriu Obras Publika tenke tau matan hodi halo barjen ka baleta bee nia dalan, nune’e iha tempu udan, bee ho volume ne’ebé maka’as labele ameasa ba komunidade nia moris.
Reportajen : Nelfiano
Foto : Nelfiano