Dili, 25 Fevereiru 2025 (Média Democracia) – Ohin União Juventude Suku Mau-Nuno realiza komunikadu imprensa ida ne’e nu’udar aktu diskordansia ba Ministériu Edukasaun, ligadu ba informasaun ne’ebé Jornal Independente publika iha dia 19/02/2026 kona-ba kondisaun eskola Paralelu Dugau nian, saida mak Jornal Independente publika ne’e kondisaun realidade ne’ebé estudante sira infrenta iha prosesu aprendizajem.
Porta-voz Julino Maia de Araujo hateten, União Juventude Suco Mau-Nuno habadak (UJESMA) hanesan organizasaun Juvenil ida neʼebé hamri’ik ho nia karakteristika nu’udar organizasaun independente no apartidaria, ho pozisaun hanesan instrumentu atu defende no promove justiça iha Suku Mau-Nuno.
“Eskola Paralelu Dugau ne’e la’os konstrui husi Ministério Edukasaun, maibé eskola refere konstrui husi vontade no kosiensia inan-aman no Profesores sira, tanba estudantes ne’ebé hela iha Aldeia Mau-Suka labele asesu ba eskola EBF 1.2.3 Martinho de Araújo Mau-Nuno, tanba distansiamentu ne’ebe do’ok, kondisaun estrada ne’ebé la di’ak, inklui laiha transporte atu tulun estudante sira ba partisipa aula.” Dehan Porta-voz UJESMA, Julino Maia de Araujo ba Jornalista sira iha Jardim 5 de Maio 25/02/2026
Porta-voz hatutan, liuhusi kondisaun la di’ak sira ne’e forma konsiensia inan-aman no Profesores sira nian hodi konstrui eskola Paralelu Dugau iha fulan Janeiru tinan 2017, Eskola Paralelu Dugau nu’udar rezultadu husi kondisaun moruk no tristeza ne’ebé tinan barak ona povu ki’ik no ki’ak nia-oan hasoru iha Suku Mau-Nuno Postu Administrativu Ainaro Munisípiu Ainaro.
“Problema ne’ebé estudante no Professores sira hasoru iha eskola no antes ba eskola hanesan kondisaun Estrada, tanba dalan diresaun husi aldeia Mau-Suka ba eskola, difikulta tebes movimentasaun ema nian liu-liu labarik sira ne’ebé ho idade ki’ik, susar atu ultrapasa tanbá tahu-naruk bainhira udan-been tun rai. Ho nune’e, rekomenda hela ba parte ne’ebé toma responsabilidade ba asuntu infraestrutura bele anota hela mós preokupasaun refere.” Hatutan Porta-voz UJESMA
Porta-voz afirma, depois ultrapasa husi tahu-naruk to’o ba eskola, problema ida neʼebé estudante no Profesores sira sei hasoru mak kondisaun eskola ne’ebé grave no la tulun estudantes no professores sira atu fahe siensia ba malu, tanba eskola didin de’it uza kalen, labele atu salva bainhira udan bo’ot, problema seluk eskola laiha kadeira no meza neʼebé sufisiente atu fasilita estudante sira iha prosesu aprendizajen.
Esplika liután liuhusi Komunikadu Imprensa ida-ne’e União Juventude Suco Mau-Nuno hakarak rekomenda ba Ministeriu Edukasaun atu solusiona lalais problema ne’ebé koloka ona hanesan, Konstrui Eskola foun, fasilita kadeir no meza tuir kuantidade estudante nomos kria bibleoteka ne’ebé sufisiente ba estdante sira.
Reportajen : Nelfiano
Foto : Nelfiano