Dili, 10 Marsu 2026 (Media Democracia)- Polisia Nasional Timor-Leste (PNTL) sei buka tuir Inan feton ida ne’ebé partus nia bebé iha Hospital Nasional Guido Valadares (HNGV) no abandona durante semana tolu.
Iha loron 09 fulan Marsu tinan ne’e Komandante Eskuadra Cristu-Rei hatan kontaktu husi Hospital Nasional Guido Valadares hodi hakat ba haree duni bebé ne’ebé foin moris no nia inan abandona hela iha HNGV.
“Hau rasik simu telfone husi parte Seguransa HNGV nomos husi ICU nian neebe bebe iha ba, no hau ba too duni HNGV hau haree duni insidente neebe viral iha media sosial katak inan feton ida bartus iha HNGV husik hela nian bebe,nia lao lakon tiha.” Dehan Komandante Eskuadra Cristu-Rei Inspetor Xefe Polísia, Paulino de Carvalho ba jornalista sira iha nia knaar fatin, Becora, Tersa ne’e (10/03/2026).
Imspetór Xefe Polísia ne’e haktuir, hosi akontesimemtu ne’e membru Polísia Nasional Timor-Leste buka tuir kedas bebé nia-inan nia paradeiru.
“Ami buka tuir ona alin feto neebe ba partus HNGV no husik hela nia bebe durante semana tolu iha neeba, maibe ohin dadersan ami hetan ona rejultadu, katak familia husi alin feto neebe bartus nia bebe ami hatene ona, maibe alin feto neebe husik hela nia bebe ita seidauk hatene, maibe hau fiar katak aban hanesan ita sei hetan rejultadu.” Nia informa
Tanba ne’e, PNTL Eskuadra Cristo-Rei sei esforsu hodi buka tuir autóe ne’ebé abandona nia Oan hodi hetan nia paradeiru, tanba aktu hanesan ne’e konsidera krime.
“Husi parte investigasaun katak, aktus ida nee krime, tanba husik hela ema ida neebe ita boot kous durante fula 9, depois bartus mai ita-boot husik, entaun oinsa ita nia responsabilidade nu’udar inan no aman ida ba ita nia oan, ho situasaun sira hanesan nee nu’udar Komandante Eskuadra Kristu-Rei sei esforsu hela buka tuir nafatin nia paradeiru iha ne’ebé, mais ami hatene ona hein ba foti.” Nia afirma
Nia hatutuan, kazu hanesan sei prosesu investigasaun depois sei aprezenta ba Ministeriu Públiku, tanba ne’e Polísia sei esforsu hodi buka tuir ba inan ne’ebé abandona nia bebé iha HNGV.
Reportajen : Estefania
Foto : Estefania