Dili, 13 Marsu 2026 (Média Democracia) – Sekretária Estadu Arte no Kultura (SEAK), hala’o enkontru entre Sekretáriu ASEAN Corea-Centre hodi ko’alia kona-ba interkambiu entre Nasaun rua, Timor-Leste no Korea. Enkontru refere hala’o iha edifisiu SEAK, Sexta feira semana ne’e.
Sekretária Estadu Arte no kultura SEAK, Jorge Soares Cristovão hateten, Sekretariu Jeral ba ASEAN Corea-Center ne’ebé halo vizita iha Timor-Leste, no antes ne’e realiza uluk ona sorumutu ho Excelensia Primeiru Ministru, hafoin ohin loron halo mós sorumutu ho SEAK hodi ko’alia kona-ba servisu sira ne’ebé atu haree iha futuru.
“Pontus prinsipal ida maka, Kim husu para ita bele hamoris no iha kolaborasaun entre Timor-Leste, tanba Timor-Leste nu’udar membru foun iha organizasaun ASEAN no Korea mós parte ida husi ASEAN, tanba ne’e ohin nia husu atu Timor-Leste nia partisipasaun liuliu ba interkambiu kulturais sira hodi promove kultura entre Timor-Leste no Korea nian” Dehan Sekretária Estadu Arte no kultura SEAK, Jorge Soares Cristovão
Nia mós haktuir tan katak iha fulan Setembru tinan 2026 sei hala’o aktividade iha Korea no hetan konvida hodi partisipa iha aktividade refere.
“Iha fulan setembru agora sei iha aktividade ida iha Korea, ami mós simu informasaun ida husi Sekretáriu Jeral no hakarak konvida partisipasaun husi Timor nian ne’ebé osida sei hodi aprezentasaun dansa tradisionais sira, nomos ita nia rede soru na’in sira hodi aprezenta iha Korea, nune’e nia mós husu Governu liuliu ba SEAK iha oportunidade balun ne’ebé tinan kotuk liu ona, tanba Timor seidauk sai membru efetivu ba membru ASEAN tanba ne’e mak momentu ne’eba Timor-Leste seidauk envolve partisipasaun ida ne’e” Haktuir Sekretária Estadu Arte no kultura SEAK
Nia mós informa katak SEAK sei akompaña Sekretáriu Jerál ASEAN Corea-Center hodi ba vizita grupu Arte Moris, grupu Rede Souru na’in no Loja Tais sira.
“Ida ne’e mak ohin ami hahu deskute no sira mós husu ita atu hatudu ita-nia kultura tradisionail sira ne’ebé iha. Iha situasaun ida ne’e ami mós iha kordenasaun ona ho ita-nia Embaixada Timor-Leste iha Korea, la’os ita de’it mak atu tau osan maibé governu mós presiza tau osan atu konvida ita-nia artista sira ba. Ohin ami koalia para haklaken no habelar liután ita-nia kooperasaun ida ne’e ba futuru. Iha vizita ida ne’e Sr Kim mós hakarak haree direita ita-nia artista sira, nune’e mak ohin ha’u hateten ba Sr. Sekretariu Jeral Kim katak, ha’u bele akompaña nia hodi vizita fatin hirak ne’ebé ohin ami deskute, nune’e sei halo nia ajenda ida hodi vizita grupu Arte Moris, grupu Rede Souru na’in, no grupu Lojas ba Tais. Atu nune’e sai hanesan referensia ida ba nia.” Informa Sekretária Estadu Arte no Kultura Jorge Soares Cristovão
Iha parte seluk Sekretáriu jeral ASEAN Corea-Center, Kim Jae-Shing haktuir, nia sei ba vizita fatin museum nasional no fatin ba kultura sira.
“Depois de ohin iha ona enkontru SEAK husi parte Korea nian mós hakarak atu vizita hamutuk ho SEAK ne’ebé mak sei lori ami ba vizita fatin museum nasional sira nomós fatin ba Kultura sira ne’ebé mak ami hakarak atu haree kultura no identidade Timor nian nomós ao mesmu tempu ami hakarak sosa mós produtu kultural balun” Dehan Kim Jae-Shing
Aktividade ida ne’e kolabora no partisipa husi estadu membru ASEAN sira ba hamutuk ho Korea atu hamosu interkambio ida ne’ebé atu fahe iha promosaun entre Timor-Leste, Korea ho estadu membru ASEAN sira, nomOs ko’alia oituan, oinsa maka bele haree kapasitasaun rekursu umanu ba Timor-Leste, nune’e hodi haree prosesu preparasaun sira iha futuru.
Reportajen : Nélia
Foto : Nélia