Dili 07 Abril 2026 (Média Democracia) – Porta-voz Polisia Nasionál Timor-Leste (PNTL) Superintendente Xefe Polísia João Belo dos Reis informa, iha Sesta loron 03 fulan Abril 2026 akontese kazu ilísitu iha área fronteira ne’ebé deskonfia Membru FALINTIL -Forsa Defeza Timor-Leste (F-FDTL) ho oknum Polísia Nasional Timor-Leste (PNTL) hatama motor RX-King ida mai Dili.
Kazu ne’e akontese mais ou menus iha oras tuku 16:00, ne’ebé ekipa konjunta husu informsaun polísia nian husi Servisu Nasionál Intelejensia (SNI), no F-FDTL konsege deteta movimentu transporte balun ne’ebé transporta sasan kontra bandu mai husi fronteira tama kapitál Dili, nune’e ekipa duni tuir no konsege deteta katak soldadu husi institusaun F-FDTL balun fasilita hela tranzasaun hodi halo atividade kontra bandu.
“Membru PNTL ne’ebé envove iha atividade ne’e mak ho inisiál SP no membru forsa armasa Komponente Navál mak ho inisial ED, ita asegura kedas iha tempu ne’eba, ho sasán evidensia halo ona prosesu ho numeru NUC 0117/2026-PNSIK ne’ebé aprezenta ona ba Ministeriu Públiku.” Dehan Porta-voz PNTL Superintendente Xefe Polísia João Belo dos Reis ba jornalista sira liuhusi konferénsia imprensa iha Komandu Jerál Tersa ne’e (07/04/2026)
Nia hatutan, iha ona informasaun ne’ebé polísia rekolla katak membru PNTL ne’e husi Unidade Polisia Marítima mak envolve direta prosesu refere.
“Depoizde ita loke tiha investigasaun ita deteta katak sira nain rua ne’e iha relasaun familia no nia kolega nia foti nia kareta ba uza ne’e nia la informa ba no la iha konesimentu ba nia, depois bainhira kareta ne’e ba to’o fronteria-nia nain la hatene polisia halo tiha apreensaun mak nia foin hatene.” Hatutan Porta-voz PNTL Superintendente Xefe Polísia
Superintendente Xefe Polísia ne’e esplika, kareta refere tula de’it motor RX-King, no kareta ho motor aprezenta ona ba Ministeriu Públiku ne’ebé sasán sira ne’e tama kategória kontra bandu.
Porta-voz informa, sasan hirak ne’e membru PNTL no forsa armada hatama liuhusi Palaka Batugade, depois ekipa informasaun sira deteta hapara nia iha fatin ne’ebá, maibé ekipa konjunta husu kareta ne’ebé lori motór ne’e la koopera nune’e sira duni tuir no konsege tama kapital Dili laran mak foin kaer iha Dili.
Tuir informasaun ne’ebé iha katak, kareta ne’e nia laran tula mós kilat manu (kilat anin), maibé bainhira ekipa konjuta hapara tiha kareta refere, iha karreta motor de’it mak iha, sasan seluk la iha.
“Investigasaun sei lao hela hodi buka tuir mós sasan sira ne’ebé ita deskonfia, nune’e sira bele asegura tiha.” Informa Porta-voz PNTL Superintendente Xefe Polísia
Portavóz ne’e afirma, ba kazu ne’e PNTL konsidra nu’udar fraglante delitu, tanba bainhira membru PNTL no F-FDTL tula motor ba karreta iha area Palaka, ekipa konjunta deteta kedas no husu atu koopera maibé kondutór mak la koopera.
Kazu ne’e konsidera fraglante delite, tanba bainhira nia tama mai, duni tuir to’o fatin iha Dili depois mak sira kaer no nia foti.
“Dadaun ita halo hela investigsaun ba membru PNTL no membru Komponente Navál. Ita la detein sira, tanba ita husu orientsaun ba Ministeriu Públiku, MP orienta ba ita atu halo prosesu normál.” Afirma Porta-voz
Maski nune’e, investigasaun ba membru PNTL ne’e sei kontinua lao hela, tanba prosesu krime ne’e nafatin ba oin.
Iha biban ne’e Porta-voz PNTL subliña, atu prevene atividade ilísitu iha fonteira Komandante Jeral fó atensaun ba iha Komandu UPF no UPM no servisu intelejensia sira atu halo serbisu ne’ebé di’ak liu hodi foku iha área fronteira hodi halo prevensaun ba ilisitus kontra bandu ne’ebé akontese iha liña fronteira.
Iha fatin hanesan, Segundu Komandante Jerál PNTL Komisaria Asistente Polísia Natércia Eufrazia Soares Martins afirma, kazu hatama sasán kontra bandu ne’e inklui mós membru FALINTIL-Forsa Defeza Timor-Leste (F-FDTL) husi Naval no sira nia Komandu mós informa ona no hatene ona.
Enkuantu, Orientasaun husi Komandu jerál PNTL ida-idak hola nia responsabilidade iha nia kada Unidade, Departamentu, Munisípiu ida-idak, hodi hatene sira nia dever, ne’ebé hakerek ona iha Leí sira.
“Oinsá atu jere rekursu ne’ebé iha hodi tau atensaun ba sira nia misaun atu iha fronteira ka iha ne’ebé de’it, ida-ne’e ohin atensaun makaas bá komandante ida-idak toma responsabilidade ba mós disiplina membru sira nian, iha ezekusaun servisu akompaña to’o nia finalidade hodi aprezenta relatoriu no rekoñese servisu di’ak no fó sansaun loke prosesu ba sira ne’ebé servisu la hatudu ninian komportamentu servisu ne’e.” Dehan Segundu Komandante Jerál PNTL Komisaria Asistente Polísia Natércia Eufrazia ba jornalista sira iha Komandu jerál PNTL Caicoli
Segundu Komandante Jerál PNTL Komisaria Asistente Polísia ne’e mós hatutan, ba kazu ida-ne’e agora daudaun iha Investigasaun Kriminál ne’ebé sira hatene iha ne’ebá iha prosedimentu krime ne’ebé sira sei utiliza para bele prosesa kazu ne’e.
Segundu Komandante ne’e mós hateten, individu ida ka rua mak kontra fila-fali ninia dever ne’e rasik, entaun iha ne’ebá regra ida forte atu bele aplika, maibé tuir nia prosedimentu.
“Komandu durante 24 horas vezes 7 dias sempre hetan update informasaun relatoriu husi terenu, ne’ebé akontesimentu sira ne’e Komandu hatene, no ita-boot sira hatene katak Leí ko’alia klaru xa tan membru sira ne’ebé hala’o nia kna’ar nu’udar Autoridade Seguransa liu-liu Polísia Nasionál Timor-Leste nia iha papel.” Hatutan egundu Komandante Jerál PNTL Komisaria Asistente Polísia Natércia Eufrazia
Papel primeiru mak eduka ema atu kumpri Leí obriga ema atu tenke komprende Leí mais husi ida ne’e, individu ida rua mak kontra fila-fali ninia dever ne’e rasik, entaun iha ne’ebá regra ida forte atu bele aplika, maibé tuir nia prosedimentu.
Reportajen : Estefania
Foto : Estefania