Dili, 08 Abril 2026 (Media Democracia) – Segundu Komandante Jerál Polísia Nasionál Timor-Leste (PNTL), Komisária Asistente Natércia Eufrazia Soares Martins, informa kona-ba problema Superintendente Polísia Júlia Gama nian ne’e sai prioridade ba komandu atu haree situasaun ne’e.
“Komandante julia nia problema nee buat kiik ida iha elementu boot nia laran entaun ida nee sai prioridade ita bele haree. Atu produa servisu neebe kualidade ita tenke hetan membru ida ne’ebé iha disiplinar di’ak.” Dehan segundu komandante Natercia ba Jornalista sira iha komandu Jeral PNTL Caicoli tersa ne’e (07/04/2026)
Nia esplika, iha instituisaun PNTL iha regras no regulamentu, Lei no Disiplinar maibé sasan sira ne’e depende ba keixa.
Tanba ne’e nia parte hanesan segundu komandante jeral PNTL la ko’alia espesífiku ba Superintendente Polísia Júlia Gama maibé kona-ba disiplina.
“ha’u ko’alia de’it asuntu disiplina ida ne’e sai prioridade komandu nian atu bele haree fila fali no buka solusaun tuir lei ne’e rasik iha tinan ida ne’e.” Nia realsa
Natercia dehan, nu’udar ofisial Superior ida, bainhira membru balun iha problema, sempre bolu no husu kona-ba motivu husi problema ne’e fó atensaun no buka meius nune’e bele hetan solusaun.
“Hanesan ofisial superior kona-ba ida ne’e sempre fo samada no fo atensaun nomos fo atensaun kona-ba regras sira para ofisais ida-idak sira bele hatene sira nia aan, ida neebe mak sira bele uza variavel ba públiku no ida neebe mak kesi aan iha istituisaun nee tenke halai ba buka solusaun iha ne’ebá.” Nia informa
Segundu Komandante Jerál PNTL ne’e afirma kona-ba asuntu ne’e seidauk fiksu atu garante maibé iha legalidade tanba ema hotu iha lei no prosesu nia okos, tanba ne’e sei garante tuir lei ne’ebé vigor ona.
“Prosesu disiplinar neebe antes nee fo suspensaun fulan walu (8) nee ita sei verifika tanba iha istituisaun PNTL iha gabinete ida responsabilidade liu ba asuntu sira hanesan ne’e.” Nia hakotu
Reportajen : Estefania Cardoso
Foto : Estefania Cardoso