Dili, 21 Abril 2026 (Media Democracia)- Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) iha segunda (20/04) ezekuta Mandadu Tribunál Judisiál Primeira Instánsia Dili hodi detein kondenadu kazál ida ho oan nurak hodi kumpri pena prizaun tinan 5 no tinan 7.
Mandadu ne’e bazeia ba NUK : 0161/23.DSIK, kondenadu kazál ne’e komete kazu krime Violénsia Domestika ne’ebé akontese iha loron 17 fulan Marsu tinan 2023, iha aldeia, Laloran, Suku Bairo Pite, hasoru vítima lezada inisial Mds to’o baixa iha Hospital Nasional Guidu Valadares no lakonsege salva nia vida.
Kazu ne’e, previstu iha kódigu penal tipu krime iha artigu 146 Ofensa ba integridade fizika maka’as hasoru lezada to’o lakon vida.
Diretór Diresaun Servisu Investigasaun Kriminál, Superintendente Xefe Polísia João Belo dos Reis informa, kazál ne’e hela la hamutuk, inisiál HX nu’udar laen ho idade 45 hela iha Bairo Pite no inisiál MB nu’udar fen ho idade 41, hela iha Gleno hodi lori sira ba kumpri sentense sala iha prizaun Becora no prizaun Gleno.
“Horseik ami ezekuta mandadu tribunal nian ida, mandadu prizaun ida ba kazál ida hela ketak ketak ida hela iha nia uma dili ida hela iha ermera, na’in rua ne’e ho kondisaun oan nurak hela maibe ida ne’e mandadu ami ezekuta kompetensia tribunal nian ho kompetensia ministeriu justisa nian atu haree kondisaun tratamentu ba kazal ne’e no nia oan iha prizaun” Dehan Diretór DSIK João Belo dos Reis ba jornalista sira iha nia knaar fatin Kuartel Jerál PNTL Caicoli tersa ne’e
Kondenadu kazál ne’e kumpri pena prizaun tuir desizaun tribunál, MB kumpri prizaun tinan 5 iha prizaun Glenu hamutuk ho nia Oan no HX kimpri tinan 7 iha prizaun Becora.
“Tamba sira ida-idak kumpri pena prizaun 5 anus (tinan lima) no 7 anus (tinan hitu), feto hetan tinan lima mane hetan tinan 7 ne’ebé sira oinsa mak bele trata sira nia kondisaun oan ne’ebé mak sei nurak hela ne’e hau hanoin parte ministeriu justisa liuliu parte prizaun nian iha ona kondisaun balun atu rezolve.” Dehan JB Reis
Bainhira ekipa husi DSIK atu ba foti kondenadu sira, kontaktu uluk sira hodi lokaliza ba sira-nia lokál, nune’é kazál ne’e koopera di’ak ho parte seguransa hodi lori ba kumpri iha prizaun.
Reportájen: Estefánia Cardoso
Foto: Lensa PNTL