Dili, 23 Abril 2026 (Media Democracia)- Konsellu Imprensa Timor-Leste halo reuniaun ho jornalista no na’in ba média sira hodi halo sosializasaun kona-ba alterasaun daruak ba regulamentu no 2/21 de 17 de Março, konaba-atribuisaun prémio ba jornalista sira husi Konsellu Imprensa.
Diretór Ezekutivu Konsellu Imprensa, António Dias hatete, sosializasaun ne’e importánsia liliu ba regulamentu asembleia.
“Atribuisaun Premiu ne’e ita hahu desde tinan 2018 mai leten , konsellu imprensa nota katak aplikasaun ba média ne’e ladun makas entaun ita halo mudansa balun ne’ebé ita hanoin bele estimula ou hasai kondektividade premiu ninian nune’e bele aumenta diak liu tan” dehan Diretór Ezekutivu liuhusi nia intervensaun iha reuniaun ho jornalista sira kuarta ne’e (22/04)
Nia dehan, premiu anuál ne’ebé kada tinan konsellu imprensa oferese ne’e haree ba média ka jornalista nia utilidade la’os simu prémio de’it maibé hatudu nia kualidade.
“Prémiu ne’e ita fo tanba iha nia utilidade la’os de’it tanba simu prémiu ne’e maibé hatudu duni kualidade manan na’in prémiu no dignidade, regularidade media ida ne’ebe manan na’in servisu ba tanba ne’e mak ita nia enkontru ne’e importante tebes” Nia esplika
Tanba ne’e António Dias iha esperansa ba jornalista sira ne’ebé servisu iha instituisaun média bele konkore atu nune’e bele dignifika jornalista sira nia servisu.
“Ita buka atu nusa de’it maibé iha mós oportunidde ne’ebe ita dignifika i apresia sira nia obra jornalístiku sira ne’ebé iha impaktu ba sosiedade Timor-Leste iha sira-nia servisu no kontribui ba dinámika democracia entaun ho ida ne’e ha’u preside ba ita boot sira enkontru ida ne’e nakonu ho rezultadu para regulamentu ne’e bele util ba prosesu aplikasaun prémiu ba tinan ida ne’e.” Nia haktuir
Konselleiru Joaquim de Fátima Coutinho haktuir, sorumutu nia objetivu atu haree kona-ba produtu realistiku ne’ebé durante aplika husi konsellu imprensa, tinan hirak liu ba halo politika ba jornalista sira media sira mai hatama produtu.
“Iha ami nia mandatu ami muda politíka ida ne’e la’os imi mak mai hatama de’it maibé ami rasik mak sei halo avaliasaun ka tun ba iha instituisaun média hodi haree kona-ba ba ita-boot sira nia produtu sira oinsa atu haree sira ne’ebe mak iha kualidade depois ami bele halo avaliasaun no ikus ita ba iha prosesu bele submete.” Dehan konselleiru Joaquim ba jornalista sira hafoin reuniaun
Joaquim afirma katak maske iha sira-nia mandatu hasoru problema barak liu kona-ba liberdade imprensa, liberdade espresaun maibé sira iha esperansa hodi kontribui ba ita-nia rai liliu liuhusi formasaun sira.
Reportájen: Estefánia Cardoso
Foto: Estefánia Cardoso